Tapos na ang kontrata sa Dos Derek Ramsay, libre nang lumipat sa Singko!

SA PRESSCON ng Corazon, Ang Unang Aswang, inamin ni Derek Ramsay na tapos na ang kontrata niya sa ABS noong February 29 at ngayon ay malaya na siyang magdesisyon kung mananatili ba siya sa ABS o mag-oober da bakod sa TV5. Inaming kinausap ni Sir Gabby Lopez ang amang si Mr. Derek Arnold Ramsay at kinausap din siya ni Ms. Malou Santos at nagsabi ang mga ito na sana ay manatili siya sa Kapamilya Network na matagal na niyang tahanan.

Bukas naman sa pagsasabing malaki ang utang na loob niya sa ABS at ‘di niya maaaring makalimutan ang mga tulong na naibigay nito sa kanya, ang problema ay walang klarong proyektong nakahain kung ano ang susunod na gagawin ng hunk actor.

Kung loyalty nga naman ang pag-uusapan ay walang kukuwestiyon dito dahil napatunayan na naman ni Derek na loyal talaga siya sa ABS. Ilang beses nang in-offer-an ng iba’t ibang istasyon ang aktor na triple pa nga sa talent fee niya sa Dos, pero nanatili rito at ginawa niya ang lahat ng makakaya sa bawat proyektong ipinagkakatiwala sa kanya.

Inamin ni Derek na masakit ang iniisip ng iba na pera ang maaaring maging dahilan para lumipat siya ng ibang istasyon, ito ay may kinalaman sa lumabas na kuwento na kaya raw siya lilipat sa bakuran ng TV5 ay dahil makikisosyo ang mga magulang sa pagpo-produce ng Amazing Race.

Ayon sa aktor, matagal nang kasosyo ng ama si Mr. Manny Pangilinan sa kanilang CCTV business, kung saan maging ang mga nausong swipe machines sa ABS ay nangga-ling din dito. ‘Di itinago na may offer talaga sa kanya ang TV5, pero sa lumabas na kuwento na gagawin daw niya rito ang Ama-zing Race, klinaro ng hunk actor na walang ganitong alok sa kanya ang Kapatid Network at sa natatandaan niyang laging sinasabi rati ay gusto niyang maging contestant sa nasabing show.

Sa ngayon, abala sa promo ng nasabing pelikula, kung saan kapareha niya si Erich Gonzales, sinisimulan na rin ni Derek ang pelikulang pagtatambalan nila ni Bea Alonzo under Star Cinema, pagkatapos ng pagtatambal nila dati sa pelikulang And I Love You So kasama si Sam Milby.

SA NASABING presscon din inamin ni Erich Gonzales na pinili niyang hindi magsalita dati sa isyu sa kanila ni Angelica Panganiban, dahil desisyon ito ng Star Magic para hindi na rin lumaki ang issue. Pinaliwanag naman ng young actress na naiintindihan niya kung magalit man sa kanya si Angelica dahil sa ‘di magagandang kuwento na lumabas sa kanila ng boyfriend nitong si Derek.

Ang maganda sa ngayon ay maayos na ang relasyon nila ng kapwa aktres, kung saan magkasama nga sila sa isang shampoo commercial. Ikinuwento ni Erich na binabati niya si Angelica ‘pag nagkikita sila at gumaganti naman ito ng bati sa kanya. Ayon pa sa dalaga, ang pinagsimulan ng kuwento ay dahil pinakilala siya ng aktor sa pamilya nito sa Tagaytay minsang galing sila sa taping dahil gusto siyang makilala ng ina ni Derek at ng kapatid nito na avid viewers ng Magkaribal. 

Nang tanungin sa presscon kung bukas ba siyang magkagusto kay Derek kung walang Angelica sa buhay ng kapareha sa ngayon, para kay Erich ay mabait, gentleman, marespetong tao at guwapo ang aktor at kahit sinong babae ay maaaring magkagusto rito. Pero nagbitaw ng salita si Erich na ayaw niya sa taga-showbiz at mas gusto niya ay isang pribadong lalaki ang makakarelasyon.

Maiba Lang
By MELBA R. LLANERA

Previous articleDra. Vicki Belo, bibigay din sa konting himas ni Hayden Kho?!
Next articleMocha, binabastos ang bandera ng Pilipinas sa sexy music video?!

No posts to display