ILANG BESES DIN naming nakausap si Mommy Dorothy tungkol sa pinagdadaanan ngayon ng anak niyang si Sunshine Dizon at naramdaman naming hirap na hirap ito at hindi na niya alam kung ano ang mabuting gagawin para sa kanyang anak.
May mga ilang pag-uusap kami na umiiyak ito nang husto dahil nag-away na naman sila ni Sunshine. Hindi ko na mawari kung anong klaseng relasyon meron silang mag-ina.
Ang tanging ipinapayo na lang namin kay Mommy Dorothy, mabuting pagbakasyunin na muna si Sunshine dahil dumaan na naman ito sa matinding depression kaya na-hospital ito.
Ang sabi ni Mommy Dorothy, nasobrahan daw ng na-take na Tylenol si Sunshine dahil sa matinding sakit ng ulo.
Isinugod ito sa Cardinal Santos Hospital at overnight itong na-confine. “Kaya nga imposible ‘yang sinasabi nilang buntis ito dahil du’n pa lang sa hospital tiyak nalaman na iyan ng mga doktor, pinag-usapan na iyan,” paliwanag ni Mommy Dorothy.
Ilang araw nang na-pack-up ang Tinik sa Dibdib ni Sunshine at hindi rin nito sinipot ang ilang TV guestings pati ang Live Chat nito sa NMI kamakalawa lang dahil hindi na ito makontak.
Ang sabi ni Mommy Dorothy, nasa Tita niya ito sa Batangas at nagpapahinga pero babalik na rin daw ng Maynila.
ILANG BESES DIN naming tinawagan si Sunshine pero hindi ito sumasagot.
Nakapagdesisyon na raw itong mag-Amerika na muna at magbakasyon doon sa Daddy niya.
Balak din daw nitong mag-aral sa Amerika, at sinusuportahan naman ito ni Mommy Dorothy basta makabubuti sa kanyang anak.
Parang iyon na rin ang gusto ni Mommy Dorothy para makapagpahinga na rin ito at pati na rin daw siya ay hindi na dumaan sa matinding stress dahil sa problema sa kanyang anak. “Para na rin akong nabunutan ng tinik sa dibdib,” himutok sa amin ni Mommy Dorothy.
Nagdesisyon na rin ang GMA-7 na palitan na lang si Sunshine at pinag-uusapan na nga nila ngayon kung ano ang gagawin nila sa script para ma-justify naman ang pagkawala ni Sunshine at palitan na ito.
Ang narinig namin, si Nadine Samonte raw ang ipapalit pero wala pa kaming nakuhang official statement mula sa GMA-7.
Nakipag-usap na si Mommy Dorothy sa mga taga-GMA 7 at inaasahan namang maayos ang pagpapaalam nila. Wish naman ng lahat na sana makabubuti ito kay Sunshine at kung gusto man nitong bumalik sa pag-aartista, sana hindi na maulit itong nangyayari sa kanya.
Wala pang masasabing tunay na dahilan sa nangyari kay Sunshine. Pero duda ng lahat, lovelife na naman ito at maaaring problema sa ilang kaibigang malapit sa kanya.
By Gorgy’s Park
