HINDI LANG ISANG beses namin narinig ang mga hinaing ng mga field reporter ng mga showbiz talkshow tungkol kay Gerald Anderson. Isang umpukan ‘yon nang may marinig kami na mukhang negative news about Gerald.
Ayaw naming maniwala, pero noong dalawa o tatlo na ang nagsasabi, roon namin pinakinggang mabuti ang mga kuwento.
Kapansin-pansin ang pagbabago na nga raw ng ugali nito pagdating sa pakikitungo sa mga nag-iinterbyu sa kanya, nagrereklamo na raw ito?
“Nung intinterbyu namin siya, ang sagot niya, may nauna nang nag-interbyu sa kanya. Ang sabi pa niya, ang haba-haba na nga ng interbyu at mukhang tamad na siyang magpainterbyu,” sey ng isang naka-experience.
“Sinagot ko siya na iba naman ang tanong namin sa nag-interbyu na nauna. So, hindi na namin siya pinilit, ayaw ng tao kaya anong magagawa namin?” Pahayag pa ng isang field reporter.
“Ngayon namin nakita na malaki na nga ang ipinagbago niya. Sana lang, ha?! Huwag dumating ang panahon na wala nang lumalapit sa kanya na press para siya interbiyuhin. ‘Yun ang masakit tanggapin, ‘yung kung kelan mo gustong mainterbyu, saka naman walang may gusto,” sey pa.
“May nagbago na talaga sa kanya. Hindi na siya ‘yung tulad nang dati,” sabi pa.
Ayaw naming isipin na lumaki na ang kanyang ulo dahil sikat na nga siya. Big star, ‘ika nga. Kaya nga habang maaga ay malaman nitong si Gerald na may hindi tama sa kanyang mga ginagawa.
Hindi pa naman huli ang lahat at may panahon pa para magbago.
At hanggang ngayon nga, hindi kami makapaniwala. At pati raw sa billing ay may reklamo na raw ito? Nagtatanong lang po.
KINAUSAP NAMIN SI Ejay Falcon sa variety show para sa piyesta ng Kamias, Quezon City sa paanyaya ni Kapatid na Ogie Diaz. Umiikot kasi ngayon ang balitang meron na siyang anak sa pagkabinata. At sa probinsiya pa nila raw nakatira ang babaeng kanyang naanakan.
“Hindi totoo ‘yon, huwag kayong maniwala sa tsismis,” sagot ng binata.
“Maniwala kayo ‘pag may balitang meron na siyang apo,” sagot naman ng kanyang manager na nagpapatawa.
“Ang totoo, nagka-girlfriend ako noon sa province namin, mga 5 to 6 years ago na. Matagal na ‘yon pero hindi kami nagkaanak. At mga bata pa kami nu’n,” explain niya.
“Nagugulat din ako sa mga bali-balita. Wala pa po talaga akong anak,” tanggi niya ulit.
Well…
NAKITA NA NAMIN nang harapan ang limang nagwagi sa PBB Double Up last Sunday sa studio ng The Buzz. Nakita rin namin nang harapan ang favorite naming si Jason na naging third placer lamang.
Hinabol pa nga namin siya sa kanyang dressing room. Pero isinara ang pinto kaya hindi namin siya nakausap.
May kaliitan lang pala siya. At matangkad pa yata kami. Nagkaroon pa raw ng briefing para sa mga mag-iinterbiyu sa kanila.
Pero kahit na pangatlo lamang siya ay du’n namin nakita na malakas siya sa masa. Kaya naman hindi malayong sumikat na nga siya. Sa totoo lang, kahit hindi siya ganu’n kaguwapo ay meron naman itong karisma kaya naman marami ang sumuporta sa kanya.
May nagtanong nga sa amin kung ano sa tingin namin, may naging gay lover na raw ba si Jason? O, kaya naman ay may naiwang girfriend ito sa kanilang malayong probinsiya.At baka isang araw ay magsalita ito in public at sabunutan na lang itong si Melissa, Melai o Isay ba?
Ang speaking of Melai, masuwerte na nga siya dahil nga sa dami ng pumila at nagpa-auditions ay isang Melai at hindi pa kagandahan ang magiging Big Winner. Nagkaroon pa siya ng ka-loveteam kaagad. At ‘yan ang lamang niya kay Pokwang.
Kunsabagay, bata pa si Melai at tama lang namang siya’y umibig at ibigin.
Sana hindi lumobo ang ulo kaagad nina Melai at Jason.
by Fernan de Guzman
Fer ‘Yan Ha?!
