Dennis Trillo at Jennica Garcia, isasalba ang kanilang show!

BONGGA ANG TAMBALAN nina Ogie Alcasid at Michael V bilang Angelina at Yaya dahil bukod sa kanilang daily game show na Hole in the Wall, meron na sila ngayong pelikulang ipu-produce ng GMA Films. Ito ‘yung Spoiled Brat na siyempre tungkol sa pagka-bratty ng alaga ng yaya ni Angelina.

Nagkaroon na ng first shooting day nu’ng nakaraang Martes at ang isa pang dagdag na sorpresa sa pelikulang ‘yun, ang pagsasama nina Aiko Melendez at Jomari Yllana. Hindi raw muna puwedeng sabihin kung ano ang role nila sa pelikulang ‘yun, pero mahalaga raw ito at tiyak na kagigiliwan ito ng mga manonood.

Parehong excited sina Aiko at Jomari sa first shooting day nila, dahil hindi pa pala nila ito nasabi sa anak nilang si Andrei. Pagkatapos ng shooting pa raw nila ito sasabihin na tiyak ikatutuwa ng bagets.

Matagal na rin namang okey na ang pagkakaibigan nina Jomari at Aiko kaya wala silang problema, at kaya nga nila tinanggap ang project na ito dahil para na rin sa kanilang anak.

MAY MGA NAGPAPARATING sa amin ng mensahe na parang mas type pa raw nila ang tambalan nina Dennis Trillo at Pauleen Luna sa Adik sa `Yo na gumaganap bilang magkasintahang Batangueño. Nagkahiwalay na sila sa kuwento at magtatagpo na sina Dennis at Jennica Garcia na talagang katambal ng actor sa romantic-comedy series na ito.

Inaasahang tataas ang rating nitong Adik sa `Yo kapag magkasama na sina Dennis at Jennica dahil kung hindi pa rin ito umaarya, baka mas umepek pa nga raw ito kapag sina Dennis at Pauleen na ang pagsamahin.

Wala namang isyu kay Pauleen kung sino ang ipa-partner sa kanya. Type daw niya ang role niya rito sa Adik kaya talagang kinakarir daw niya pati ang pag-aaral ng puntong Batangueño. Kaagad namang nakuha nila ni Dennis ang pagka-Batangueño kaya ang galing nilang dalawa sa eksenang nagpapaalamanan na sila.

Abangan na lang natin kung magki-klik itong tambalan nina Dennis at Jennica. Sila lang naman ang inaasahang makapagpapataas ng rating ng Adik sa `Yo.

NASA DEPARTMENT OF Justice na pala ang kasong Libel na isinampa ni Richard Gutierrez laban sa PEP at hinihintay na lang daw ang resolution nito pagkatapos sinumpaan ng aktor ang affidavit niya roon sa DOJ nu’ng nakaraang Martes.

Ani Richard, gusto lang naman daw niyang lumabas ang katotohanan kaya pursigido siyang ituloy ang kasong ito.

Walang taga-PEP na dumating doon pero nandu’n ang abugado nilang si Atty. Sandra Coronel na nagsasabing nakahanda naman silang harapin ang kasong ito.

May mga nagsasabing marami na ang nagnanais na maayos na lang ang kaso at magkabati na sila bago ibaba ang resolution, dahil inaasahang magkakabati pa rin naman sila sa ending. Sabi naman ng abugado ni Richard, open naman sila sa pag-aayos kung sakaling may mediation. Pero hindi naman daw sa kanila manggagaling ang hiling na iyun.

Sagot  naman ni Atty. Coronel ng PEP, matagal na silang nagnanais na magkaayos na dahil maliit lang naman daw ang mundo ng showbiz. Pero tila hindi pa raw handa si Richard na harapin sila kaya hintayin na lang daw natin ang desisyon ng korte sa kasong ito.

by Gorgy’s Park

Previous articleTago: Chickboy na solon, atat din sa Kho-Halili scandal
Next articleDouglas Quijano: the best talent manager

No posts to display