Willie Revillame, inirereklamo na dahil sa show?!

More Luck
by Morly Alinio

HINDI NA NATUTUWA ang mga taga-Novaliches dahil mas lalo ngayong nagiging mabigat ang daloy ng trapiko sa kanilang main road (Quirino Ave.) matapos na magpakalat-kalat ang ilang mga tao na nagbabakasakaling makasali sa programang Willing Willie ni Willie Revillame, bukod pa sa bagong tayong SM sa nasabing lugar.
Maging ang mga security guard ng Channel 5 na dati-rating tahimik ang kanilang buhay ay nabulabog nang dumating sa nasabing TV station ang Willing Willie.

“Kailangang maisaayos ng Channel 5 ang mga taong nagpupuntahan sa kanila dahil nagiging dahilan nga sila ng pagta-trapik sa bahaging lugar na iyan ng Quirino.”

Ayon pa rin sa aming nakausap na ayaw ipasulat ang kanyang pangalan, patuloy na dumarami raw ang nagrereklamo. “Hindi naman kami galit kay Willie or sa Channel 5, ang sa amin lang ay isaayos sana nila ang situwasyon dahil sa dami ng mga taong nasa harapan ng kanilang building, hindi malayong may masagasaan diyan at iyon ang iniiwasan natin.”

Mas malala ang mga audience ngayon ng Willing Willie kumpara sa Wowowee dahil ngayon ang mga taong gustong makapasok sa nasabing show ay nagbababad talaga nang kung ilang araw, kung saan ay nakita naming personal na meron nang nagsasaing sa gilid ng isang bakanteng lote.

“Tatlong araw na kami rito pero okey lang kasi alam naming makakapasok din kami,” pahayag iyon ng isang matandang babae na galing pa raw sa Batangas.

Dinagdagan din ng Channel 5 ang bilang ng kanilang mga guwardiya dahil sa dami talaga ng mga taong nagnanais makapasok sa nasabing TV Network.

FOUR SHOOTING DAYS na lang ay tapos na ang pelikulang Tanging Ina Part 3, kung saan ay hindi na kasama si Heart Evangelista sa nasabing final episode ng historic movie ni Ai-Ai delas Alas. “Kung galit ako kay Heart? Hindi. Bakit naman ako magagalit sa kanya, wala naman kaming relasyon. “Tumatawang sabi ni Ai-Ai nang puntahan namin siya sa location ng nasabing pelikula.

Ayon kay Ai-Ai, hindi raw siya nanghihinayang kung hindi man nakasama si Heart sa part 3 ng kanyang pelikula, dahil una at higit sa lahat, natapos at maganda naman daw ang kinalabasan ng kanilang movie kahit wala si Heart.
Samantala, mariing itinanggi ni Direk Wenn Deramas ang balitang galit siya kay heart.”No, hindi ako galit. Kaya lang nu’ng una, ang sabi niya may problema sa schedule, kaya ang Tanging Ina mismo ang nag-adjust ng oras at araw ng shooting para sa kanya. Pero last minute, hindi siya dumating sa shooting, kaya nag-decide na akong huwag na lang siyang isama, at the same time, nasa kabilang station na siya, ‘di ba? Actually noong una kinokontak ko pa nga si Tita Annabelle para sa schedule niya, kaya medyo nagulat ako nang wala na pala sa kanya si Heart.”
Hindi naman daw galit si Direk Wenn at si Ai-Ai kay Heart, at hindi raw kawalan ng kanilang pelikula kung walang Heart na mapapa-nood. “Ang ginawa ko na lang, nag-revise kami ng konti sa script at pinalabas naming hindi makauuwi ng Pilipinas ang role ni Heart, kaya nabuo ang story kahit wala siya sa mga eksena,” sey pa ni Direk Wenn.

Previous articleBelinda Bright: Nawawalang kinang!
Next articleKC Concepcion, pinalalabas na bastos at maldita ng dating manager?!

No posts to display