‘Wag na ngang magsalita COCO MARTIN, AYUSIN NA LANG ANG ANAK!

NAGSISIMULA NA SI Coco Martin na ayusin ang kanyang buhay. Siyempre, ang mga dahilan ng pagsasaayos na kanyang ginagawa ay dahil mayroon na siyang kakayahan ngayong maisaayos ang mga bagay-bagay, dahil maganda na ang takbo ng kanyang movie career, kaya ibig sabihin din noon ay kumikita na siya nang malaki, kumpara sa dati. Bago nagpainterbyu sa telebisyon kamakailan ang dating sexy actress na si Katherine Luna, nauna nang nagsalita na si Coco, na aayusin muna niya ang kanyang buhay.

Siguro, ang isusunod na niyang aayusin ay kung anuman ang dapat niyang gawin para sa diumano’y anak niya kay Katherine. Baka kasi naiinip na ang dating aktres sa kanyang paghihintay kung may suporta bang matatanggap ang kanyang anak sa ama nito. Pumalo kasi bigla ang kasikatan ni Coco nang kunin siya ng ABS-CBN, kaya mag-iisip ka talaga na baka milyones na ang kinikita niya. Pero ang totoo, ilang teleserye pa lang naman ang nagagawa niya. Talaga lang ito ang panahon niya para mapansin.

Hindi naman tatalab kay Coco ang sinasabing bad karma kung wala siyang intensiyon na talagang talikuran ang kanyang responsibilidad sa mga taong naghahabol sa kanya. Tama lang ang ginawa niya, na hindi na siya sumagot sa mga lintanyang pinakakawalan ni Katherine. Sa tuwing magpapainterbyu si Katherine sa talkshow, lagi namang ang isyu niya ay iresponsableng ama si Coco. Huwag na talaga siyang magsalita. Gawin na lang niya, na kung naayos na niya ang para sa kanyang sarili, ay isunod na niya ang dapat para sa kanyang anak.

NAPAKAHIRAP NANG PANIWALAAN ang mga salita at plano ni Nora Aunor tungkol sa kung kailan ba talaga siya uuwi ng Pilipinas. Lagi na kasing nabibigo ang mga nag-aabang sa kanyang pagbabalik. Nagpaparamdam na rin naman kasi siya na gusto na rin niya talagang magbalik-bayan. Nakikipag-communicate na siya sa kanyang mga kaibigan sa showbiz, at isa na nga sa kanyang mga tinawagan ay ang lady scribe na si Ate Mercy Lejarde.

Umugong ang balitang itong buwan ng May ay darating na siya, pero wala pa rin. Nitong huli, ang pinsan na ng Superstar at dati ring sumikat na si Maribel “Lala” Aunor ang nagsabing month of July na raw uuwi rito ang mommy ni Ian de Leon. Talaga lang, huh?

Usap-usapan ngayon na may malaki raw problema ang Superstar, at ito ay tumutukoy sa pagkawala ng kanyang boses.  Mayroon ding sinasabi, na nang lumala raw sa ibang bansa ang kundisyon ni Ate Guy, binutasan diumano ang kanyang leeg at nilagyan ng tubo. Naituturo nga na nagsimula ang mga problema nu’ng magparetoke siya sa mga banyagang duktor. Ang malaki raw problema ngayon, hindi na bumalik ang dating timbre ng boses ni Ate Guy, kaya problemado diumano kung papaano pa siya makapagko-concert, na siya niyang unang pinagkakakitaan sa kanyang paninirahan sa Amerika. Kaya may posibilidad na magdemanda ang premyadong aktres.

Mahirap po ang pinagdaraanan ngayon ni Ate Guy, kung totoong binutasan siya sa leeg, nilagyan ng tubo, at nitong huli ay hindi na bumalik ang dating boses. Ang inyo pong lingkod ay isang buhay na patotoo. Eight years ago po, nagkaroon ako ng malubhang karamdaman, at na-tetano din ako noon dahil sa isang sugat, na-ICU ako noon, at binutasan po ako sa leeg at nilagyan ng tubo.

Nang gumaling po ako, kahit po hindi ako singer, hindi na rin po bumalik ang kakayahan kong kumanta ng mataas na tono. Minsan din, kahit magsalita ako, napakahina pala ng dating sa pandinig ng mga tao sa paligid ko. Marami pang ibang hindi magandang pakiramdam. Nag-iwan din po sa aking leeg ng malalim at pangit na peklat ang isinagawang pagbutas sa aking leeg. Mayroon ding ibang pasyente na kapag tinanggal ang tubo sa leeg ay nawawala na talaga ang boses. Kung totoo ang mga nasabing pangyayari kay Ate Guy, napakalaki nga talaga ngayon ng kanyang problema, kaya ipagdasal din natin siya.

ChorBA!
by Melchor Bautista

Previous articlePinabayaan na rin ng Siyete Richard Gomez, sasamahan na si Lucy sa Singko?!
Next articleRUFFA GUTIERREZ, may death threats!

No posts to display