Suporta sa Anak Mula sa Ama, Pero Hindi Kasal

Dear Atty. Acosta,

MAY LIMANG taong gulang na anak ako sa aking dating boyfriend. Lumalaki na po ang kanyang gastusin kaya naman nais kong humingi ng suporta mula sa kanyang ama, ngunit nagdadalawang-isip po ako dahil hindi naman kami kasal. Sana po ay mabigyan ninyo ng linaw ang aking suliranin.           

Juliet

 

Dear Juliet,

ANG BAWAT magulang ay may obligasyong magbigay ng suportang pinansiyal sa kanilang mga anak, maging lehitimo man ito o hindi (Art. 195, Family Code of the Philippines). Ang iyong anak ay maituturing na isang illegitimate child dahil siya ay ipinanganak nang hindi nasasailalim sa isang legal at may-bisang kasal ang kanyang mga magulang. Dahil dito, hindi magiging awtomatiko ang kanyang karapatan na makatanggap ng suporta mula sa kanyang ama. Bago siya makatanggap nito, kinakailangan muna siyang kilalanin ng kanyang ama bilang kanyang illegitimate child.

Maaaring mapatunayan ang estado ng isang illegitimate child sa parehong paraan kung paano pinapatunayan ng isang legitimate child ang kanyang estado. Ito ay makikita sa Article 172 ng Family Code of the Philippines. Ayon dito, ang isang illegitimate child ay kailangang kilalanin ng kanyang ama bilang kanyang anak sa pamamagitan ng tala sa birth certificate ng bata o sa isang pinal na desisyon ng hukuman. Maaari ring kilalanin ang isang illegitimate child sa isang pampublikong dokumento o sa isang pribadong dokumento na nasa sulat kamay ng kanyang ama. Ito ay ang mga pangunahing patunay ng pagkilala ng isang ama sa kanyang illegitimate child. Kung hindi kinilala ng ama ang kanyang illegitimate child sa pamamagitan ng mga unang nabanggit, mayroong pangalawang uri ng patunay o ebidensya upang mapatunayan ang pagiging isang illegitimate child ng isang tao. Ito ay sa pamamagitan ng kanyang bukas at patuloy na pagtamo ng estado ng isang illegitimate child sa loob ng mahabang panahon at iba pang mga paraan na pinapayagan ng ating Rules of Court.

Kung ang iyong anak ay kinilala ng kanyang ama sa pamamagitan ng alinman sa mga nabanggit, maaari siyang makatanggap ng suporta mula sa kanyang ama. Ang halaga ng suportang kanyang matatanggap ay iaayon sa kakayahang kumita ng kanyang ama at sa kanyang mga pangangailangan (Art. 201, Family Code of the Philippines). Bukod dito, maaari rin niyang magamit ang apelyido ng kanyang ama alinsunod sa Republic Act No. 9255.

Atorni First
By Atty. Persida Acosta

loading...

One thought on “Suporta sa Anak Mula sa Ama, Pero Hindi Kasal

  1. May 2 anak po kmi ng daddy ng anak qoh khit hindi po kmi kasal nkapirma nman po sia s birth cert. Ng mga anak q at apelyido nya ang gamit.. 7 yrs old n po ung panganay grade 2 ung bunso po 4 yrs old at s sunod n taon mg kikender n rin cia, ang problema po sa isang taon mga 4 o 6 n beses lng mgbigay ang daddy nila mataas n ung 500.. ano po bah ang dpat gawin upang msustentohan ang anak q ng tama,,, my gf n po kc ngayon ang daddy ng anak q nga 2 weeks n cla at my anak ung babae n 8 months s ibang lalaki inaaway po aq nung gf inuutusan nya aq n ilayo q n ung mga anak q s daddy nila at tuwing sabado sahod ng daddy nila nkabantay ung gf kya wlang mbigay sa anak q, ng mkausap q po ung nanay ng daddy ng anak q sabi nya wla n dw krapatan ung mga anak q humingi s daddy nila kc hiwalay n kmi at kung mgbibigay dw ung daddy ng anak q kylangan dw kung mgkno lng dw ang ibigay un lng dw ang mkukuha ng anak q at gusto p po nila wg pupunta ang mga anak q s trabaho ng daddy nila kylangan dw pumunta p s bhay nila at kylangan dadaan muna s nanay ung perang ibibgay… sna matulungan nyo aq kung anong dpat kong gawin pra sa pgreklamo s daddy ng anak qoh… marami pong salamat

Leave a Reply

Your email address will not be published.