Sen. Bong Revilla, paid to keep mum on Hayden Kho case?

PINAGTAWANAN LANG NI Senador Bong Revilla ang kumakalat na kuwento ngayon na kaya raw hindi pa nasusundan ang unang paghaharap sa Senado nina Dr. Hayden Kho at Katrina Halili ay dahil “nabayaran” na siya ng kampo ng doktor at ni Dra. Vicki Belo.

Mabilis na kumalat ang balita, pero ipinalagay lang ng mambabatas na isa na namang paraan ‘yun ng panliligaw sa tunay na isyung nireresolbahan ng Senado ngayon – ang kung sino ang nagpakalat ng mga sex videos sa merkado.

Hindi na pinagtatalunan ngayon kung sino ang nagbuo ng mga sex videos, walang ibang gumawa nu’n kundi si Dr. Hayden Kho. Ang doktor na sa halip na mahiya sa kanyang mga ginawang kahalayan sa kababaihan sa video ay parang insensitibo pa nga, dahil nu’ng minsang magpunta ito sa mall ay kumakaway-kaway pa sa mga taong nakakakilala sa kanya.

Naalala tuloy namin ang kuwento ni Manay Lolit Solis nu’ng magtangkang magpakamatay ang doktor. Kinabukasan daw nang magising ito, isang tanong ang kanyang ibinato sa mga tao sa kanyang paligid.

Agad nitong itinanong kung laman daw ba ito ng mga pahayagan nu’ng umagang ‘yun. Pero hindi nagtagumpay ang doktor, dahil itinago ni Dra. Belo ang nangyari sa kanya.

Parang lumalabas tuloy na puro drama lang ang kanyang ginagawa, masyadong matakaw sa publisidad ang doktor. Sa madaling salita ay isang KSP (kulang sa pansin) ang doktor na ito.

Siguro nama’y busog na busog na ngayon si Dr. Hayden sa mga publisidad na tinatanggap nito. ‘Yun nga lang, hindi pampapogi ang mga nasusulat tungkol sa kanya, puro pagkainis-pagkabuwisit sa kanyang ginawa.

Ayon kay Senador Bong, nakakatawa ang mga taong nag-iimbento ng mga kuwento para lang mailihis ang tunay na isyu. Hindi nga naman nagtagumpay ang grupong ‘yun sa pagkukuwestiyun sa kanyang kredibilidad. Lalong hindi binili ng publiko ang pagreretoke sa kanyang mga still photos sa isang pelikula para lang palabasing meron din pala siyang sex video.

“Kahit bilyon pa ang ialok sa akin, hindi ko ‘yun tatanggapin. Pinaninindigan ko ang sinimulan kong aksiyon. Tatapusin ko ito, nandito pa rin ako para sumuporta sa mga babaeng walang kalaban-laban na nabuyangyang ang buhay at kaluluwa sa mga sex videos na kinunan ni Dr. Hayden nang patago,” mariing pahayag ni Senador Bong Revilla.

Marami pang ibang kuwentong palulutangin ang kampo ng doktor para maiba ang direksiyon ng interes ng publiko, kung anu-anong senaryo ang puwede nilang palabasin, pero hindi sila magtatagumpay.

Magaling nang kumilatis ang publiko ngayon kung panligaw lang ba ang mga pinalulutang na kaganapan. Ang tunay na isyu pa rin ang hinihintay ng ating mga kababayan, hindi ang mga kuwentong-kutsero riyan para lang sirain ang kredibilidad ng mga tumutuligsa sa kanila.

NU’NG UNA, KUWENTO-KUWENTO lang ang diumano’y namumuong relasyon nina John Lloyd Cruz at Ruffa Gutierrez. Nasa kalagitnaan na ang mga tsismisan nang mapabalitang nag-break na sina John Lloyd at Liz Uy. Si Ruffa agad ang pinagbintangan ng marami na dahilan ng paghihiwalay ng dalawa.

Nu’ng magtagal-tagal, ipinanganak na ang kuwentong nagkasama sila nang matagal na panahon sa isang hotel. Pareho nilang pinabulaanan ang kuwento, pero ayaw pa ring mamatay-matay nu’n.

Lalong naging kapansin-pansin ang situwasyon nang magkaroon ng hidwaan sina Ruffa at ang kanyang ina. Para huwag nang lumala ang kanilang away, nagdesisyon si Ruffa na umalis muna sa kanilang bahay.

Magkaiba ang sinasabi ng mag-ina. Ayon kay Ruffa, walang ibang taong sangkot sa away nilang mag-ina. Pero ayon naman kay Tita Annabelle, may isang young actor na nagpapadala ng bulaklak at pagkain sa aktres sa kanilang bahay.

Sino kaya sa kanilang mag-ina ang nagsasabi ng totoo? Si John Lloyd Cruz ba ang tinutukoy na batang aktor ng ina ni Ruffa?

Ang mga kuwentong-showbiz pa naman kapag ayaw mamatay-matay, ibig sabihin ay totoo ‘yun.

Cristy Per Minute
by Cristy Fermin

Previous articleExecs to cut Sharon’s talk show?
Next articleKrissa Mae Arietta, sinulot si JayR sa non-showbiz gf?!

No posts to display