Sarah Geronimo, selos na selos kay Cristine Reyes?!

SELOS NA SELOS pala si Sarah Geronimo kay Cristine Reyes. Ayon sa ating source, one time daw ay nagre-rehearse sina Cristine at Rayver Cruz sa isang room sa ABS-CBN at nagkataon na naroroon din sa kabilang silid si Sarah na naghahanda para sa isang production number niya sa ASAP XV.

Ayon sa aming source, panay raw ang sulyap ni Sarah kina Cristine at Rayver. “Mahal na mahal pa rin ni Sarah si Rayver. Hindi lang niya magawang ipaglaban talaga si Rayver dahil takot siya sa kanyang mga magulang, lalo na kay Mommy Divine.”

Kung paniniwalaan pa rin natin ang mahadera naming kaibigan, sinabi pa rin nitong wala raw kasigla-sigla si Sarah habang nire-rehease ang isang kanta para sa ASAP. “Sino ba namang gaganahang kumanta kung nakikita mo ‘yung lalaking mahal mo na masaya kapiling ang iba.”

KUMPIRMADONG LILIPAT NA nga si Anjo Yllana sa Singko, kung saan kamakailan ay nagsimula na itong mag-taping kasama si Tuesday Vargas para sa isang amazing story na may pagka-comedy ang tema.

Nakausap namin si Anjo at inamin nitong nasa Channel 5 na siya ngayon pero wala naman daw siyang exlusive contract na pinirmahan. “Matagal na akong may show rito sa Singko pero iba itong sa amin ni Tuesday. Maganda ito at tiyak na magugustuhan ng mga tao, kasi ang tema nito may pagka-comedy, may mga nakakatakot at kung anu-ano pa, kaya masaya.”

Sa kabilang banda, inamin ni Anjo na nangangarap sila ng kanyang asawa na si Jackie Manzano na magkaroon ng anak na kambal. “Kaya lang medyo may dapat kaming ayusin bago namin gawin iyon, dahil may kailangang tanggalin sa katawan niya bago uli siya magbuntis,” at iyon ay IUD, na ikinabit noon nang manganak ang aktres sa bunso nilang si Sean.

Sa pagkukuwento pa rin ni Anjo, aming napag-alaman na muntik na siyang magpa-vasectomy. “Mabuti na lang umayaw ako at siya na lang ang nagpalagay ng IUD.”

Next year daw ay balak muling magpakasal nina Jackie at Anjo. “Kasal na kami sa Amerika, pero may plano kaming magpakasal next year.”

Ang isa raw sa natutunan ni Anjo sa paghihiwalay nila noon ni Jackie ang huwag maging padalus-dalos sa mga desisyon.

FEELING WAGI SI Willie Revillame dahil since nang umere ang programa niyang Willing Willie, “sumakit” na ang ulo ng mga big boss ng News Department ng Channel 2 at Channel 7. Ang time slot kasi ng programang Willing Willie ay siyang pinaghaharian ng mga programang pambalitaan.

“Masaya siyempre si Willie. At least, napatunayan niyang marami pa rin siyang tagasunod,” sabi ng isang taong malapit kay Willie, na nagsabi pa ring nabago raw ni Willie ang mundo ng primetime show.

SPEAKING OF PRIMETIME show, mukhang nagiging basura ang Noah nitong mga huling linggo. Papangit nang papangit ang takbo ng istorya, na labis naming pinanghihinayangan dahil sinubaybayan namin ang programang ito, bukod pa sa Imortal nina John Lloyd Cruz at Angel Locsin.

Ang totoo niyan, hindi lang kami kundi marami rin ang disappointed sa pagtatapos ng Magkaribal, partikular na sa huling gabi na hindi mo maintindihan kung bakit ganu’n ang ginawa nilang ending. Para bang nagalit ang direktor at scriptwriter sa pagtatapos.

Walang mabigat na detalye sa pagkakakulong ni Vera (Angel Aquino). At ano ang nangyari nang bumagsak ang chandelier? Basta na lang ni-narrate na sina Chloe (Erich Gonzales) at Caloy (Enchong Dee) ay nagpakasal, habang si Victoria naman ay lumapit sa dalawang bata na nangangarap ng bagong sapatos at damit habang nakamasid sa billboard ni Gelai (Bea Alonzo).

Cheap at basura ang last night ng Magkaribal. Sinayang nila ang maganda nilang sinimulan. Parang tinipid na hindi mo maintindihan ang ending ng nasabing programa. ‘Yun lang!

More Luck
by Morly Alinio

Previous articleAwayang Gretchen Barretto at Claudine Barretto, ‘sinasawsawan’ ng isang ‘lalaki’!
Next articlePiolo Pascual, pinagbigyan si Marissa Sanchez!

No posts to display