NAGSIMULA LANG muna sa blind item, pero heto na nga, kinumpirma nang buntis si Katrina Halili at magsasalita na ito sa Startalk bukas.
Tahimik na muna siya sa ngayon pero aamin daw siya at mapapanood ito sa Startalk bukas.
Hindi ko pa naman nakakausap si Katrina pero ang dinig ko lang tatlong buwan na ang dinadala niya at ang tinuturong ama ay si Kris Lawrence.
Hindi naman kasi umaamin ang dalawa sa kanilang relasyon, pero hindi naman yata sila nag-break at tuluy-tuloy pa rin ang kanilang relasyon.
In fairness naman kasi kay Kris, hindi nito iniwan si Katrina sa gitna ng iskandalo noon sa sex video nila ni Hayden Kho. Nandiyan lang si Kris para sumuporta sa kanya.
Kaya naging seryoso na ang kanilang relasyon , at nagbunga na nga ito.
Ang balita pa, baka tanggalin na siya sa My Beloved, pero buntis naman siya doon kaya puwede pa rin. Tingnan na lang natin kung ano ang desisyon ng GMA 7 sa kalagayan ngayon ni Katrina.
MARAMI NA raw ang nagpapayo kay Sharon Cuneta na tigilan na ang pagpapatol sa mga bashers niya sa Twitter.
Ang latest na naman nga-yong nakakaaway niya ay mga fans ni Piolo Pascual na pati tuloy si KC Concepcion nadadamay.
Siyempre anak na niya ang dinadamay kaya hindi nakapagpigil si Sharon, pinagpapatulan niya ito lahat.
Meron pa raw itong pasaring na mas pinupuri raw niya si BB Gandanghari dahil naging totoo lang ito. May mga ganu’ng factor na si Sharon, kaya parang hindi na yata tama na pagpapatulan niya ito sa estado niya ngayon.
Si Regine Velasquez ay may pinatulan din noon na isang basher dahil nilait ang anak niya pero nahimasmasan din siya, tumigil na siya at binawi din niya ang mga pinagti-tweet niya.
Kaya nga iniiwasan na niyang pag-usapan ito ngayon dahil dedma na raw talaga siya sa mga nanlalait sa kanya.
Kaya si Judy Ann Santos, ayaw mag-Twitter dahil ayaw niyang makakatagpo ng mga ganu’ng panlalait. Sanay na raw siya sa mga ganu’ng panlalait pero ayaw na niyang makadagdag pa itong sa Twitter.
Pero ipinagtanggol ni Juday si Sharon dahil anak niya siyempre ang nadadamay kaya hindi napigilan ng megastar na pumatol.
Naintindihan daw niya si Sharon sa puntong ‘yun, pero kung puwedeng iwasan, dapat iwasan na lang daw.
Kaya kung ako kay Sharon, tigilan na niya ang Twitter-Twitter na ‘yan! Hindi naman nakakatulong eh, kundi lalo ka lang mapapasama.
Siguro dapat na simulan na ni Sharon ang show niya sa TV5 para may iba siyang pinagkakaabalahan kesa sa ubusin ang oras niya sa kati-tweet, ‘no!
Mga Mata ni Lolita
by Lolit Solis
