Sa dami ng kadikit na nega issues Albie Casiño, malabo nang malinis pa ang pangalan

PAGKATAPOS NANG MATAGAL-TAGAL ding pananahimik tungkol sa isyung siya raw ang ama ng pinagbubuntis ni Andi Eigenmann, finally ay nagsalita na rin si Albie Casiño tungkol sa isyu sa nakaraang presscon ng Aswang.

Agad ay tinanong namin kung nagkausap na ba sila ng ex-girlfriend, pero ‘hindi’ ang agad na sinagot sa amin ni Albie. Dagdag na pahayag pa nito na, “I don’t want anything from them, if they want anything from me, sila ang pumunta.”

Napag-usapan din ang tungkol sa pagpapa-DNA test para masiguro raw kung siya talaga ang ama ng pinagbubuntis ng ex- girlfriend. Ayon sa young actor, usap-usapan na ito sa simula pa lang, pero para sa kanya ay ituloy na rin kahit ‘di niya ito pinag-iisipan pa para siguro lumabas na rin ang katotohanan.

Naparatangang walang paninindigan, tumatakbo sa responsiblidad, ilan lamang ito sa mga masasakit na mga salita na naipukol kay Albie. Pero para sa actor, hahayaan na lang niya na ibang tao na malalapit sa kanya ang sumagot kung ano bang klase ng pagkatao ang mayroon siya.

Sa tanong namin kung sa palagay ba niya ay unfair na agad ay nahusgahan siya ng ibang tao, ‘di naitago na ‘oo’ naa-unfair-an siya, pero wala namang bagay na ang ‘fair’ sa kanya ngayon, lalo’t tanggap niya na sa dami ng mga negatibong issues na naidikit na sa kanyang pagkatao, malabo na niyang mali-nis  pa ang kanyang pangalan.

Hindi rin siya aware sa mga masasakit na salita sa kanya ng mga magulang ni Andi na sina Jaclyn Jose at Mark Gil. Ayon kay Albie, hindi niya alam ang mga sinasabi nito laban sa kanya, pinararating lang ng iba niyang mga malalapit na mga kaibigan dahil ‘di siya nagbabasa ng mga issues patungkol sa kanya.

Tinanong din namin ang tungkol sa komento ng iba na inaako raw ni Jake Ejercito ang responsibilidad na dapat raw sana ay sa kanya. Simple lang ang isinagot sa amin ni Albie: “That’s good for him. Congrats to you man!”

NA-HIGHBLOOD AT MEDYO uminit ang ulo ni Robin Padilla sa presscon ng Toda Max, isang sitcom na pagsasamahan nila nina Vhong Navarro at Pokwang nang mapag-usapan ang tungkol sa ‘di pagkakatuloy masali ng pelikula niyang Mr. Wong sa darating na Metro Manila Film Festival.

Ipinaliwang ng aktor na ang ikinasama ng loob niya ay ‘yung lumabas na mga publisidad na umurong sila gayong ang totoo namang nangyari ay nagbigay siya para sa entry ng kaibigang si Gov. ER Ejercito, ang Asiong Salonga. Aminado ring nagkaproblema sila sa pagkuha ng leading lady sa Mr. Wong, kung saan ayon kay Robin ay naiintindihan naman niya ang desisyon ng mga networks na ‘wag magpahiram ng mga artista nila dahil may mga entries din ang mga ito sa MMFF. Ang tanging siniguro sa amin ng aktor ay kaya nilang matapos ang Mr. Wong sa itinakdang date kung kailan ito matatapos, taliwas sa mga naglabasang balita na ito ang rason kung bakit sila umurong at napalitan, lalo’t kumpleto sila sa gamit na kakailanganin sa paggawa ng pelikula.

Pinag-usapan din ang tungkol sa P500,000 na seed money na binayad nila sa MMFF as entry fee. Hanggang sa ngayon, ‘di pa ito nai-babalik kay Binoe, kung saan may punto naman ang action star na ‘di ito biru-birong pera  at dapat lang na maibalik sa kanila.

Tinanong din namin kung susunod ba siya sa asawang si Mariel Rodriguez na ngayon ay nasa TV5 na. Ipinaliwanag ni Robin na ang ABS ang sumalo sa kanya mula nang lumaya siya sa bilibid galing sa pagkakakulong at hanggang to da max ang pagmamahal at pagpapahalagang ibinibigay sa kanya sa ABS ay wala siyang nakikitang rason para lumipat.

Maiba Lang
By MELBA R. LLANERA

Previous articleBalik-showbiz na, pero ‘di raw sa Siyete Sunshine Dizon, lilipat na rin?!
Next articleJohn Lloyd Cruz, ‘di nasilaw sa P1-M kada taping na offer ng TV5

No posts to display