Reklamo sa Titser na Namamalo

 

Dear Atty. Acosta,

MAYROON AKONG isang anak na nasa elementarya pa lamang. Isinumbong niya sa akin na pinalo siya ng kanyang guro nang makita silang nagkukulitan ng kanyang mga kaklase sa kanilang silid-aralan. Maaari po ba namin siyang ireklamo?

Umaasa ng inyong tugon,

Alma

 

Dear Alma,

LIKAS SA mga bata, lalo na ang mga nasa murang edad pa lamang, na maging malikot at mapaglaro, kung kaya’t kai-langan na mahaba ang pasensiya ng mga nakatatanda katulad ng kanilang mga magulang at kapatid, pati ng kanilang mga guro na siyang itinuturing nating

mga pangalawang magulang ng ating mga anak.

Sa inyong sitwasyon, maaari kayong magsampa ng reklamo laban sa guro na nanakit sa inyong anak sapagkat ito ay ipinagbabawal sa Code of Ethics ng mga guro. Ayon sa Section 8, Article VIII ng Code of Ethics of Professional Teachers, “A teacher shall not inflict corporal punishment on offending learners x x x” Ang tungkulin ng bawat guro ay ang hubugin ang mga kabataan upang mapalawig nila ang kanilang kaalaman at upang sila ay maging epektibong miyembro ng ating komunidad. Ang mga guro ay hindi maaaring gumamit ng pananakit o daanin sa negatibong paraan ang pagdidisiplina ng kanilang mga tinuturuan. Ito ay magsisilbi lamang na maling halimbawa sa kanila ukol sa pagtutuwid ng pagkakamali at maaari nila itong maipasa sa kanilang mga kaibigan at maging sa kanilang mga magiging anak. Higit pa rito, kung mapatunayan na totoong lumabag ang guro ay maaari siyang patawan ng disciplinary actions katulad ng pagbawi sa kanyang Certificate of Registration and License as a Professional Teacher, masuspinde sa pagtuturo, o ma-reprimand sa kanyang maling gawain. (Section 1, Article XII, id)

Maliban sa nabanggit, maaari rin kayong magsampa ng reklamong kriminal laban sa nasabing guro sapagkat ang kanyang ginawa ay maituturing na isang uri ng pang-aabuso sa bata. Alinsunod sa Republic Act No. 7610 o ang Special Protection of Children Against Abuse, Exploitation and Discrimination Act, “Child Abuse refers to the maltreatment, whether habitual or not, of the child which includes any of the following: (1) Psychological or physical abuse, neglect, cruelty, sexual abuse and emotional maltreatment; x x x” (Section 3, id) Kung mapatunayan ang pagkakamali ng guro ay maaari siyang makulong sa parusang prision mayor, minimum period o six years and one day to eight years (Section 10, id). Kung siya ay guro ng pampublikong paaralan, maaari siyang maparusahan ng pagkakakulong sa maximum period na ten years and one day to twelve years. (Section 31 (e), id)

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

 

Halinang manood ng “PUBLIC ATORNI: ASUNTO O AREGLO” tuwing LUNES, 9:20 pm sa AksyonTV.

 

 

 

 

 

Atorni First
By Atty. Persida Acosta

2 thoughts on “Reklamo sa Titser na Namamalo

  1. Nag aaral po ang anak ko sa private school dito sa loob ng subdivision, Nursery p lang po. Magkakaroon po cla ng field trip. Nagbgay po ako ng letter sa skul n ngsasabing hindi ko mpapasama ang anak ko dahil may check up xa ng ganon araw at pblik blik n lagnt at sipon.
    Ni rerequire po ako ng skul ng magbayd ng hlga ng field trip nila, at kung di daw po ako mgbbyad, bbili ako ng project n worth ng halaga ng field trip. Mahigit isang libo  po ang halaga non. Tama po ba ito??

  2. Dear Attorney,

           Na-trauma po ang anak ko na grade 2 sa ginawa ng kanyang teacher, maliit na private school lang po ito dito sa Taguig.. Nasagi lang po ng bata ang isang nakasabit na chart sa dingding ng classroom habang wala ang teacher.. Hindi po maayos ng anak ko dahil maliit sya at nawala ang pagsasabitanan kaya hinawakan nya na lang po ng dalawang kamay against the wall ang chart na un.. Nung dumating ang teacher, hindi nya po pinaupo ang anak ko at sinabi na tumayo lang ng ganun (nakaharap sa dingding at nkataas ang dalawang kamay na sinisikap hawakan ang chart ng hindi mahuhulog).. Pawis2 na po ang anak ko, at nung may naawang kaklase at lumapit sa kanya para tumulong ay pinagsabihan pa ng guro na wag daw tutulungan ang anak ko… Lumabas po ulit ang guro ng silid habang nasa ganung sitwasyon ang anak ko, at all the while na nasa labas ang teacher eh naging laughing stock ang anak ko ng iba nyang mga kaklase, kung ano ano ang sinabi at pinagtawanan.

            Nagkaharap harap na po kami ng may ari ng school at ung teacher na iyon, naging mahinahon naman kami lahat at kahit hindi po sya humingi ng paumanhin sa akin ay okay lang basta tumupad na lang na hindi na mauulit.. Ang kaso po ay na-trauma na ang anak ko at ayaw ng pumasok dun.. Ang gusto ko po sanang mangyari ay irefund ang registration fee para ilipat ko na lang sa ibang school ang anak ko.. Mahirap lang po kami, at lugi po kung tutuusin dahil sa mga uniform na na nabili at mga libro,, kaya sana po eh kahit man lang registration fee eh marefund namin… PWEDE PO BA ITO ATTORNEY, PLSSSS?