Para matahimik na raw ang ex-wife: Robin Padilla , ibalik na ang anak na si Alih

PARANG HINDI NA makapaghintay si Liezel Sicangco na matapos ang Ramadan, dahil apektado na raw ito sa mga nababasa niya sa internet na mga komento laban sa kanya.

Ang ikinasasama raw niya ng loob ay ang pinagmumukha siyang pera dahil hindi naman daw totoo ‘yun.

Gusto raw sana n’yang sundin ang pakiusap ni Robin na ayusin ito pagkatapos ng Ramadan, pero mukhang hindi na ito mahintay ni Leizel dahil nasasaktan na raw siya sa mga sinasabi ng iba na pera lang ang habol nito sa aktor.

Nabigyan na raw ito ng tatlong bahay sa Australia, binilhan din daw ito ni Robin ng lupa sa Pampanga worth P2 million, at may US$2,500 daw ito na monthly sustento para sa anak nilang si Zhen Zhen na nag-aaral sa Australia.

Nag-iiyak si Liezel na tumawag sa isang reporter namin sa Startalk para idepensa ang sarili niya. Sabi nito, for 20 years daw na pagsasama nila ni Robin, nanatiling tahimik daw siya at wala raw siyang ginagawa ‘pag nagkakaproblema sila.

Kaya nagsalita ito sa mga nagtatanggol kay Robin na huwag silang magsalita ng mga bagay na hindi nila alam at baka makasira lang daw ito kay Robin.

Ang ginawa ni Liezel, nag-e-mail ito sa Startalk ng mga papeles na nagpapatunay kung ano ang mga ibinigay sa kanya ni Robin. Aminado naman siyang hindi raw nagpapabaya si Robin pero foul naman daw ‘yung pagbintangan siyang kaya nag-iingay ay dahil naghahabol ng pera.

Ang concern lang naman daw ni Liezel ay ang bunsong anak nilang si Alih dahil napababayaan naman daw ito ni Robin dito at hindi nakapag-aaral nang mabuti kaya sa kanya na lang daw ito.

May nagkukuwentong madalas nga si Alih na sumasama kay Robin sa studio ng Pilipinas Win Na Win, kaya paano nga ito makapag-aaral nang mabuti?

Kaya kung ako rin naman, mas mabuting ibalik na ni Robin si Alih kay Liezel para matahimik na sila.

Ang isa pang ikina-react nang husto ni Leizel ay kaya raw nag-iingay ito dahil sa ibinigay raw ni Robin kay Mariel Rodriguez na singsing worth P1.2 million!

Sabi ni Liezel, nabigyan naman daw siya ni Robin ng singsing, pero worth P85,000 daw ‘yun na binili sa isang kamag-anak nila, at hindi naman daw nag-propose si Robin sa kanya nu’ng ibinigay ang singsing na ‘yun. Pero nilinaw nitong wala siyang pakialam sa panunuyo ni Robin kay Mariel, dahil sobrang nakapag-move on na raw sila at meron na nga siyang asawa. Ang habol lang daw niya ay ang kanyang anak at mananahimik na raw sila kapag nasa kanya na si Alih.

‘Yung mga ebidensiyang sinasabi ni Leizel na pinadala niya sa Startalk, siguro abangan n’yo na lang iyan. Pero kailangang makunan din ng reaksiyon dito si Robin na nasa India pa yata kasama si Mariel.

DUMATING NA SI Richard Gutierrez galing Thailand na halos isang buwang nag-taping ng Survivor Philippines at kitang-kita ang sobrang kasabikan nina Annabelle Rama at Eddie Gutierrez nang sinalubong nila ito sa airport.

Ang sabi ni Richard, gusto niya munang makasama ang pamilya niya pagdating nito dahil marami raw silang pag-uusapan. Pero hindi naman siya makapagpapahinga muna dahil kailangan naman niyang ituloy ang promo ng In Your Eyes na nag-showing na nu’ng Miyerkules.

Malakas daw ang first day earnings nito kaya dapat ituluy-tuloy nila ang promo para ma-maintain ang lakas, ‘di ba?

Sa Linggo, nasa Davao sila kasama si Claudine Baretto para roon naman sila mag-promote ng kanilang pelikula.

Mga Mata ni Lolita
by Lolit Solis

Previous articleEnchong Dee, kinukulit magtrabaho kahit naka-confine sa ospital?!
Next articleKris Aquino, bawal nang magsalita sa isyu nila ni James Yap

No posts to display