Masyadong napagod sa Minsan Lang… Lorna Tolentino, ayaw na munang magkontra-bida!

NGAYONG ARAW NA magtatapos ang sinusubaybayan kong Minsan Lang Kita Iibigin.

Hay salamat! Makakapagpahinga na ako nang maaga dahil pinuyat-puyat ako niyan gabi-gabi!

In fairness, proud naman ako sa mga alaga ko dahil talagang ang daming tumatawag sa akin na pinupuri nila sina Lorna Tolentino, Amy Austria at Tonton Gutierrez na mahalaga ang partisipasyon sa teleseryeng ‘yun.

Sobrang napagod sila rito sa Minsan kaya talagang nagdeklara na si Lorna na ayaw na raw muna niyang magkontrabida sa susunod niyang project. May ideya na ako kung ano ang gagawin niya sa TV5, pero pag-uusapan pa nila ng writer at direktor iyan dahil mabait na role na raw talaga ang gusto niyang gawin.

Sobrang na-drain daw siya rito sa pagiging Allondra niya sa Minsan kaya pahinga na muna siya sa pagiging masama.

Si Tonton naman ay tumatanggi na muna sa mga mabibigat na role. Kahit support lang daw basta light lang okay na muna sa kanya ‘yun. Hindi pa naman na-finalize kung ano ang susunod na gagawin ni Tonton pero malamang sa TV5 na rin siya kapag okay na ang usapan. Meron na sanang ibibigay sa kanya ang ABS-CBN 2 pero pinag-aaralan pa naman iyan.

Hindi ko naman mapilit ang alaga kong si Amy na tumanggap ng bagong offer dahil nakatono na ang utak niya na magbakasyon sa New Zealand. Gusto niyang dalawin doon ang anak niyang nag-aaral. Bukod pa diyan, ayaw na muna ng dyowa niyang si Duke Ventura na magtrabaho.

Pagkatapos ma-hospital ni Amy nang matagal, ayaw na talaga ni Duke na magtrabaho siya kaya nu’ng tinanong ko kung puwede na ba akong makipag-deal sa susunod niyang project, huwag daw muna at baka after three years pa raw siya puwedeng bumalik sa pag-aartista. Parang mas gusto na lang ngayon ni Amy na magpahinga kasama ang anak niya sa New Zealand.

Pero malaking bagay itong Minsan Lang Kita Iibigin sa kanila dahil nag-bonding silang tatlo. Kaya nga sa susunod nilang project, gusto nila sila pa rin ang magkakasama. Hay, naku! Baka mapagbintangan pa kami niyang package deal silang tatlo!

SA LINGGO NA pala bibinyagan ang panga-lawang anak nina Paolo Contis at Lian Paz. Bongga ang line-up ng mga ninong at ninang na malapit naman sa kanilang dalawa.

Nangunguna sa listahan ng mga ninong at ninang ay sina Manny Pacquiao, Marian Rivera, Ogie Alcasid, Ariel Rivera, Ynna Asistio at ilan pang malalapit nilang kaibigan.

Zalene Abriana ang name ng pangalawa nilang baby at sabi ni Paolo, tama na raw muna ang dalawa nilang anak dahil marami pang dapat na ayusin. Isa na rito ang bahay na titirhan nila dahil matagal na iyan ipinangako sa akin ni Paolo, na malapit na raw nilang lipatan ang bahay nila sa Pasig, huh!

Ang tagal na niyang sinasabi sa akin, wala pa rin ngayon. Kaya ‘yun na lang ang hihintayin ko pagkatapos ng binyag.

Ang isa pang aayusin nila ay ang balak nilang pagpapa-kasal dahil matagal na ring pinaplano iyan ni Paolo.

Mga Mata ni Lolita
by Lolit Solis

Previous articleOBSESSED
Next articlePagbabagong anyo ni Bitoy

No posts to display