HINDI NATUTUWA SI Marian Rivera sa naglalabasang isyu ngayon, na parang inaabangan ng marami ang pagsasalita ni Ervic Vijandre tungkol sa nagdaan nilang relasyon. Ngayon kasi ay pumapasok na rin sa showbiz ang ex-boyfriend niyang unang nakilala sa showbiz dahil sa pagiging model. Wala naman daw kasing dapat ipangamba ang reyna ng GMA-7 dahil dati na ay mayroong mga nag-attempt na interbyuhin at pagsalitain si Ervic, umiiwas magsalita ang modelo.
Pero kakaiba raw sa pagkakata-ong ito dahil seryoso na si Ervic sa kanyang pag-entra sa showbiz. Baka raw matukso na ang binata na magsalita tungkol kay Marian para mas lalo siyang pag-usapan. Nauna rito, noon daw unang lumantad ang guwapong modelo ay mayroong mga taong nakiusap, na kung gusto niyang mag-artista ay huwag niyang gamitin o siraan si Marian, dahil matagal din naman ang itinagal ng kanilang relasyon.
Hindi naman interesado si Marian na mapag-usapan pa si Ervic, lalo pa’t ang karelasyon na niya ngayon ay si Dingdong Dantes. Pero aware si Marian, na ang gustong marinig ng mga tao sa kanyang ex-boyfriend ay kung ano ang tunay na dahilan ng kanilang paghihiwalay. Pero, ganu’n daw talaga ang relasyon, kahit manggaling sa magandang simula, nangyayari talaga na nauuwi rin sa hiwalayan.
VERY SUPPORTIVE NAMAN si Eula Valdez sa movie career ng kanyang boyfriend na si Rocky Salumbides, na kasama nga ngayon sa kontrobersiyal na pelikulang Tarima na pinagbibidahan ni Fanny Serrano.
Para naman daw talagang bata si Rocky na nagpapaturo kay Eula ng maraming bagay at sistema sa showbiz na ‘di pa niya alam bilang baguhan. Bilang mas nauna nga sa showbiz, igina-guide naman daw ng aktres ang karelasyon na mas bata kesa sa kanya.
Nagtatagal na rin ang relasyon nina Eula at Rocky. Hindi na nagpapaapekto ang magaling na aktres sa mga nagtatanong sa kanya kung papaano niya iha-handle ang sitwasyon, kung ang kanyang boyfriend ay may makilalang mas batang babae sa showbiz at ligawan? “Negative ‘yon. Ayokong isipin. Pero, ang nakakabilib naman kay Rocky, siya talaga ‘yung nagpapakita sa akin ng mga patunay, na hindi ako dapat mag-isip ng gano’n. Mahal niya ako, kaya mahal ko rin siya,” wika ng aktres.
Naaaliw si Eula dahil ngayon daw, bukod sa papuri na marunong palang umarte si Rocky, magaling na rin daw sumagot kapag iniinterbyu ng press. “Parang nagsisimula pa lang din naman siya, kaya huwag naman tayong masyadong mag-expect ng sobra sa kanya. Pero ang nakakaaliw lang kay Rocky, gusto niyang magpursige para mapansin naman siya sa showbiz,” tsika pa ni Eula.
SOBRANG NAGAGANDAHAN AT nababaitan si Coco Martin kay Erich Gonzales. Pero bulilyaso pa rin ang dapat sana’y plano niyang pagpaparamdam ng ligaw sa young actress. Marami pa kasing inaasikaso ngayon ang magaling na aktor tungkol sa mga pagsasaayos ng maraming parte ng kanyang buhay. Iyon ang pumipigil sa kanya sa kasalukuyan para ipagpatuloy ang masugid na panliligaw sa mga babaeng nakikilala niya sa showbiz.
Sobra ang pagpapahalaga ngayon ni Coco sa magandang takbo ng kanyang movie career. Alam niya sa kanyang sarili na ito ang panahon ng mga suwerte sa kanyang pagiging artista, kaya ayaw niyang sayangin ang pana-hon at pagkakataon para mas matutukan pa niya ang kanyang trabaho. Hindi rin siya waldas sa perang kanyang kinikita dahil ang priority niya ngayon ay ang matulungan ang kanyang pamilya. Iyon ang isang magandang layunin niya sa buhay bago isipin ang tungkol sa mga personal na bagay na may kinalaman sa kanyang kaligayahan.
Hindi na bumabata si Coco. Hindi raw naman mangyayari ang tumanda siyang binata. “Una-una lang kasi ‘yan. Dati-rati kasi, palagi akong nagdarasal na magkaroon ng maraming trabaho nu’ng nagsisimula pa lang ako sa showbiz. Nangyayari na nga ‘yung kaabalahan na ‘yon, kaya ayokong magreklamo kahit na mapagod ako,” katuwiran ng aktor.
ChorBA!
by Melchor Bautista
