NAKAKALOKA! FOUR years na pala ang Pinoy Parazzi! Ang bilis, huh! Sa loob ng apat na taon, nakilala agad ang diyaryong ito na talagang nagmarka sa kamalayan ng mga taga-showbiz.
Karamihan, nairita sa atin dahil dito lang lumabas ang mga ‘di nila akalaing lalabas na ikinagulantang nila.
Wala naman silang magawa kung hindi basahin pa rin nang basahin, pagkatapos ang ending kaibigan na nila tayo, iniimbita na sa mga presscon at isa sa inaabangan nila kung ano ang susunod na mababasa nila rito.
Kaya Happy anniversary sa atin at sa lahat ng bumubuo ng Pinoy Parazzi.
ISA RIN ang Pinoy Parazzi sa unang naglabas ng gap nina Marian Rivera at Heart Evangelista, na nagsimula sa shooting ng Temptation Island.
Ang daming nadamay sa awayang ito na hanggang ngayon ay hindi pa rin naresolba kaya hintayin na lang natin kung kailan sila magkakaayos dahil tingin ko naman maayos din iyan.
Sa mga huling interview ni Marian, gusto na raw niyang maging positibo na lang at ayaw na niyang may makakaaway.
Kung dumating ang araw na magkasalubong sila ni Heart, malamang na mararamdaman din naman nila na handa na silang magkabati at magkaayos.
Ayaw lang kasi ni Marian na ipilit na magkabati sila at gawin pang isyu. Kung sakaling magkabati sila, eh ‘di magbati na at hayaan na silang dalawa na gumawa ng paraan na maayos ito.
Wala nang pilitan dahil mas mabuting sa kanila na lang ang kusa na maayos at mapag-usapan ang ano mang pinag-awayan nila noon.
Si Heart ay gusto na rin daw maging positibo na ang lahat. Hindi na raw nito iniisip ang kung sino ang nakaaway niya o nakasamaan nang loob.
Ang isa sa nadamay rito ay si Lovi Poe na dating close kay Marian, pero ngayon ay naiintrigang hindi na raw sila gaanong okay lalo na’t makakasama na nito si Heart sa bagong drama series ng GMA-7 na Legacy.
Pero parehong itinatanggi ng dalawa ang intrigang hindi sila okay. Hindi nga lang daw sila nagkakausap nang mabuti dahil pareho naman silang abala sa kanilang trabaho. Pero wala raw silang dapat pag-awayan kaya itigil na raw ang ganu’ng intriga.
Pero hindi maiwasang magkaroon talaga ng isyu dahil magkakasama na sina Heart at Lovi at hindi na nito madalas na nakikita si Marian.
Pero kung totoong okay na nga talaga sina Heart at Marian, siguro magkakaroon ng chance si Lovi na mapag-ayos ang dalawa at mabalik ang dating friendship nila.
Mga Mata ni Lolita
by Lolit Solis
