NAKAAALARMA ANG MAGKASUNOD na balitang naakyat-bahay sina Anne Curtis at Christian Bautista kailan lang.
In separate interviews, ipinahayag ni Cristian na kasalukuyang nagre-recording siya nang may tumawag na bukas ang gate ng bahay niya. Agad siyang nagpaalam at habang nasa daan, nagdasal na sanay’y walang gaanong gamit ang natangay at walang taong nasaktan. Dininig naman ang kanyang dasal, kung kaya’t nakahinga siya nang maluwag.
Palagay raw niya, hindi nakapasok ang mga magnanakaw sa kanyang bahay at sa pagtakas ng mga ito, naiwang bukas ang kanyang gate. Ipinagpapasalamat niyang may automatic alarm ang kanyang gate, kung kaya’t nabulabog ang mga nagtangkang looban sila.
“Nakabuti ang may magandang kalooban na kapitbahay ko, lalo na ang magandang neighborhood na nagmamalasakit sa amin,” pahayag niya.
Mangiyak-iyak naman si Anne Curtis habang ini-interview tungkol sa akyat-bahay gang na nakapasok sa Parañaque home niya.
“Hindi ko na po sasabihin kung anu-ano ang nakuha. Ang importante po, walang nasaktan sa mga kasama ko.” Aniyang nangangatal pa ang boses. Pero, ayon sa isang kasama niya, nagpapasalamat daw sila at wala roon si Anne nang maganap ang nakawan. Nagpapasalamat din sila at walang nasaktan, isa man sa kanilang mga kasama. Nakapasok at nakaalis ang mga magnanakaw nang hindi nila namamalayan. Buti na lang daw at madasalin ang kanilang amo, si Anne. Hindi nito nakaliligtaang ipagdasal ang kanilang kaligtasan. Hindi rin nito nakalilimutang bilinan silang ingatan nila ang mga pintuan sa kanilang bahay. Na ano mang tibay ng mga ito, mabubuksan pa rin dahil eksperto ang mga magnanakaw sa lahat ng klase ng pinto.
Tulad ni Cristian, nagpapasalamat din sila sa kanilang mga kapitbahay at kabarangay sa pagmamalasakit sa kanya. Pareho rin sila ni Cristian na balak magdagdag ng security guards at tumulong sa kanilang neighborhood para ‘di masalisihan hindi lamang sila, kundi ang iba pa nilang co-resident ng village.
TOTOO NA NGA ang gusto pa sanang ilihim ni Pokwang na “kinausap” siya ng Pambasang Kamao (Manny Paquiao) na tigilan ang pag-i-spoof sa kanyang dakilang ina, si Mommy Dionesia.
Hindi nga raw kasi naniniwala si Pokwang na marami ang nasasaktang mga kaibigan ni Mommy Dionesia sa Gensan sa panggagaya sa kanya ni Pokwang on Wowowee. Hindi rin natutuwa si Mommy Dionesia sa pagbuka-buka ng legs ng komedyana habang alsa-alsa ito sa ere ng mga dancers.
Nasasagwaan daw ang mother dearest ni Manny.
Hindi lang daw si Pokwang ang tinawagan ng Pambansang Kamao, kundi mismong si Willie (Revillame) rin. Maganda naman daw ang approach ni Manny, kung kaya’t naunawaan niya ang damdamin nito.
Wala nga namang karekla-reklamo si Manny kapag ini-spoof siya ni Pooh. Kahit pa naging katawa-tawa siya sa mga manonood, tinatawanan na lang niya. Pero, iba nga kapag sarili niyang ina ang nasasaktan. Hindi niya ito matitiis.
Inakala rin ni Pokwang na nanloloko lang ang caller na tumawag sa kanya at nagpapakilalang si Manny nga. Pero, nang banggitin na nito ang tungkol sa kanyang dakilang ina, nagseryoso na ito.
Tingnan n’yo, pinatigil agad ni Willie ang portion na iyon. Hindi na natin napapanood si Pokwang na ginagawang katatawanan ang dakilang ina ni Manny.
BULL Chit!
by Chit Ramos
