Lupa ng mga Magulang, Isinangla ng Kapatid

Dear Atty. Acosta,

 

NAIS KO pong isangguni sa inyo ang problema ng aking mga magulang. Noong 1990 ay isinangla ng isa kong kapatid ang lupa ng mga magulang ko. Mayroon kaming nakitang special power of attorney na mayroong animo’y lagda ng aming ina at thumb mark ng aming ama. Marunong pong sumulat at bumasa ang nanay ko ngunit hindi po siya nakakaintindi ng Ingles. Ang tatay ko naman, bagaman nakakaintindi ng Ingles, ay paniguradong hindi pipirma kung alam niyang pagsasangla pala iyong pinipirmahan niya. Taong 1998 po ay pumanaw ang aming mga magulang. Ang nais ko pong malaman ay kung mayroon pa ba kaming karapatan sa nasabing lupa? Mababawi pa ba namin ito?

 

Zenaida

 

Dear Zenaida,

 

SA PANAHONG ito na parehong wala na ang inyong mga magulang, tila magiging mahirap nang alamin kung totoong intensyon nilang isangla ang kanilang lupa at kung totoo bang ninais nilang ibigay ang awtoridad sa inyong kapatid upang isangla ito. Bagaman ginawa ang special power of attorney sa salitang Ingles, hindi ibig sabihin nito na hindi nila alam o naintindihan ang kanilang nilagdaan. Maaari namang ito ay naipaliwanag sa kanila sa wika o diyalekto na alam nila at malaya pa rin nilang ibinigay ang kanilang pagsang-ayon sa nasabing pagsasangla. Sa kabilang banda, mayroon din namang posibilidad na hindi nila tunay na lagda at thumb mark ang nakalagay sa nabanggit na awtoridad.

Ang mainam na magagawa mo ay ang humanap ng mga sapat na dokumento na naglalaman ng orihinal na lagda at thumb mark ng inyong mga magulang upang maikumpara ito sa nakalagay sa binanggit mong special power of attorney na ibinigay ng inyong kapatid. Kung tunay at tugma ang lagda at thumb mark ng inyong mga magulang, kailangan ninyong bigyang-galang ang kanilang naging desisyon na isangla ang kanilang lupa. Subalit kung nais ninyong mabawi ang nasabing lupa, kailangan ninyong bayaran ang napagkasunduang halaga ng pagsasangla at interes, kung hindi pa lubusang nareremata (foreclosed) ang lupa ng inyong mga magulang.

Sa kabilang banda, kung mapatunayan mo na hindi iyon ang lagda at thumb mark ng inyong mga magulang, maaari mong ipawalang-bisa ang kasunduan ng pagsasangla sapagkat, bilang isa sa mga tagapagmana ng inyong namayapang mga magulang, maaapektuhan ang iyong karapatan kaugnay ng iyong parte sa nasabing lupa. Maliban dito, nakasaad sa ating batas na upang maisangla ng isang tao ang isang bagay katulad ng lupa, kailangan na siya ang nagmamay-ari nito. Kung hindi niya ito pagmamay-ari, kailangan na siya ay binigyan ng legal na awtoridad (special power of attorney) ng may-ari upang isangla ito. (Artikulo 1878, Civil Code of the Philippines) Samakatuwid, kung hindi tunay ang kanilang lagda at thumb mark ay walang-bisa ang special power of attorney ng iyong kapatid. At dahil dito, walang magsasabing wala ring bisa at hindi balido ang kasunduan na namagitan sa kanya at sa kanyang pinagsanglaan.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Atorni First
By Atty. Persida Acosta

Related Post

loading...

One thought on “Lupa ng mga Magulang, Isinangla ng Kapatid

  1. Dear Attorney Acosta,
    Good day! Nais ko po sanang humingi ng payo hinggil sa lupa ng mga magulang nmin na matagal na pong namayapa. Isinanla po ng 2 naming kapatid na lalake ang nsabing lupa pero buhay pa po mama namin noong isinanla pero ang pinalabas po ay 100k php lng ang approved pero ang exact amount approved was 400k plus po nlaman na lng nmin lately noong namatay yong eldest brother namin. ngayon po na VOS n po yong lupa at nadivide na into 2 at nakapangalan sa mga anak ng 2brothers namin as benefiaries. Apat po kaming mgkakapatid 2 boys at 2 girls. Year 2014 namatay yong eldest brother namin na xiang nagsanla at ngpagawa ng nga agreements sa aming brgy captain na cila muna ang mgcra’cropping sa nyugan until masettle yong amortization sa LBP pero no payments done hanggang ngayon.Ang masakit ay ayaw ibigay yong share ng ida kong kapatid na babae yong share nya kasi sa knila na raw yong 2 hectares dahil nakapangalan na raw sa knia (anak ng eldest kuya nmin na namatay)Pinasumom cila ng kapatid ko sa brgy pero never po cilang umapila then lumapit uli yong sister ko sa brgy Lupon hindi rin sumipot.Ang tanong ko po attorney kung pude po ba xiang matamgal as benefiary at i’aassume nmin ang lupa tutubusin nmin yong lupa bgo mhuli ang lahat at hindi na namin ibbigay yong share nila. Marming salamat po at ngpagawa naway mbigyan po ng tugon etung problema namin. Maraming salamat po uli…God bless ? ? ?
    Gumagalang,
    Rhina Deluvio

Leave a Reply

Your email address will not be published.