Luis Manzano, hindi nagpahuli sa acting – Cristy Fermin

MALAKAS ANG ULAN nu’ng Miyerkules. Buhul-buhol ang trapiko kahit saan. Walang tigil ang pagtangis ng langit.

Maaga kaming nagsarado ng aming gallery hindi dahil sa takot na baka maabutan kami ng malakas na ulan, mababaw na malalim ang dahilan, manonood kami ng In My Life.

Noon pa namin sinasabi, mas masarap makipagkuwentuhan kapag alam mo ang paksa, ayaw naming maging tagapakinig lang sa kuwentuhan ng mga kaibigan naming nakapanood na ng pelikula.

Maganda na ang trailer ng In My Life, kumakaway na sina John Lloyd Cruz, Luis Manzano at ang Star For All Seasons na si Governor Vilma Santos para huwag nating palampasin ang kanilang obra, pero hindi pala du’n nagsisimula at nagtatapos ang lahat.

Ang huling tatlumpong minuto ng In My Life ay parang huling tatlong rounds ng boksing na hindi mo pipikitan, ihing-ihi ka na, pero hindi ka pa rin tatayo sa upuan mo para magpunta sa CR.

Matagal na naming hinahangaan ang talento sa pagganap ni John Lloyd Cruz, niregaluhan ng mga matang umaarte ang batang aktor na ito, pero ang naging rebelasyon para sa amin ay si Luis Manzano.

Napapanood kasi namin si Luis na pa-slang-slang sa kanyang pagho-host, coñong-coño ang anak ni Edu Manzano, kaya nu’ng malaman naming siya ang gaganap bilang anak na bading ng kanyang ina sa pelikula ay nagdadalawang-isip kami kung kaya ba niyang bigyan ng hustisya ang papel na ipinagkatiwala sa kanya ng Star Cinema.

Pero napahiya kami, totoo nga ang kasabihan na ang puno ng mangga ay hindi mamumunga ng santol, may pinagmanahan nga pala si Luis Manzano.

Du’n sa monologue niya sa park habang naglilitanya sa kanyang ina tungkol sa mga kabiguang hindi niya sinadyang ibigay dito ay katutok-tutok, mararamdaman mo na lang na nakikiiyak ka na sa kanya, pagkatapos ng eksenang ‘yun ay ibubulong mo na lang sa iyong sarili na magaling na aktor pala si Lucky.

Mula sa umpisang kuwadro hanggang sa kadulu-duluhan ay hindi humihiwalay sa kanilang character bilang mga bading sina JLC at Luis. Umaarte na sila, mahahabang litanya na ang kanilang bibinitiwan, pero ang aksiyon ng kanilang mga mata at kamay ay bading na bading pa rin.

WALA PA RING kakupas-kupas ang pagganap ni Governor Vilma Santos. Naisip lang namin, siya ang klase ng aktres na kahit luma at punit-punit na damit ang ipasuot mo sa kanya ay magmumukhang bago at nasa uso.

Hahalakhakan mo ang marami niyang eksena, pero makikiiyak ka sa mga pagkakataong natural na natural na niyang inilalabas ang kanyang kahenyuhan sa drama, puro singhutan ang maririnig mo sa sinehan sa mga eksenang ‘yun.

Liyebo singko na si Governor Vilma, pero hindi pa rin siya makakabog ng mga usong artista ngayon, pagdating sa pagbibitiw ng mahahabang linya at pagbibigay ng buhay sa karakter na ipinagkatiwala sa kanya ay hindi ka na magsasalita dahil papalakpakan mo na lang siya.

‘Yung eksena nila ni Luis sa park, markado ‘yun. ‘Yung pagpapalitan nila nang maaanghang na salita ni John Lloyd Cruz kung saan nanampal siya at sinampal din pabalik ng aktor, hindi kalimut-limot ‘yun.

‘Yung simpleng paghaharap uli nila ng kanyang nakahiwalay na asawang si Tirso Cruz III, halos walang mga dayalog ‘yun, pero nagsasalita ang mga mata ng Star For All Seasons sa eksena.

May mga eksena siyang maingay, pero mas mag-iingay naman ang pagsinghot mo sa madadrama niyang tagpo, mula noon hanggang ngayon ay karapat-dapat lang talaga siyang regaluhan ng koronang Star For All Seasons.

Matagal man siyang hindi gumagawa ng pelikula dahil sa sinumpaan niyang tungkulin bilang tagapamuno ng kanyang probinsiya, kapag nagdesisyon naman siyang humarap uli sa mga camera ay hindi nakapagsisising panoorin ‘yun, dahil nag-iisa lang talaga si Vilma Santos sa kanyang hanay.

Ang huling tatlumpong minuto ng In My Life ay hindi kailangang palampasin, nandu’n ang karne ng putahe, nandu’n ang mga eksenang maraming taon na ang lumilipas ay maaalala at hahangaan mo pa rin.

Cristy Per Minute
by Cristy Fermin

loading...

15 thoughts on “Luis Manzano, hindi nagpahuli sa acting – Cristy Fermin

  1. LUIS MANZANO IS INDEED A REVELATION IN ‘IN MY LIFE’!!! ang galing niyang aktor!!! he deserves to get an acting award!!!

    cristy, thanks for this! akala ko magiging bitter ka na naman kay luis. mabait ka naman pala e! keep it up!

  2. LUIS MANZANO IS INDEED A REVELATION SA MOVIE! ang galing niya talagang aktor! he deserves to get an acting award sa film na ito!

    cristy, thanks for this! akala ko magiging bitter kana naman kay luis! mabait ka rin pala!

  3. Dati gusto ko ang mga article ni Alfie, we even listened to his radio show nuong nasa Pinas pa ako over DZMM-panay tawa namin sa mga comments niya hanggang sa sumakit ang tiyan namin…but lately Ano ba ‘to? Hindi na tipong sarcastic na may halong kiliti but lately puros accusations and bitterness na…times are changing…nagiging nega na ang tao.

    • Gago at pinag uusapang dito tungkol sa pelikula na In my Life bakit mo naman siniggit si Willie hindi naman kasali sa article … BOBO hindi kaba marunong mg basa

  4. Ok ang pagbabalita mo tita cristy.

    Dapat ang trabaho mo eh film critic na lang. Kitang kita sa matalinhaga mong pananalita ang pulso at damdamin ng isang pelikula. Napanuod ko na din yung pelikula, in all fairness tama lang yung pagganap ni ate vi ngayun, unlike sa previous movies nya na puro sigaw.. Masakit sa tenga.. Di ka madadala sa ganung eksena.

    Mejo natatabangan lang ako sa pagganap ni luis. Pero pasado na din sa panlasa.

    Ang pinakamagaling na pagganap ay kay john lloyd. Madadala ka talaga sa eksena. Dapat. Me moment sana sya dun sa kabaong, added eksena sana, tapos yung confrontation scene nila ni ate vi. Ang galing.

    Panalo ito sa takilya sa tingin ko lang.

  5. He he he buhay na buhay pa rin ang mga Vilmanians. Hindi ko alam na sinabi ni Alfie iyan. Naku, masalubong ko lang siya, sabunot ang aabutin niya sa akin.

  6. ANO KAYA ANG MASASABI NI ALFIE LORENZO? SABI NIYA, MAGIGING FLOP DAY ANG IN MY LIFE. ALFIE, NAPAHIYA KA ANO? BOX OFFICE HIT ITO. MASYADO KA KASING SOUR GRAPES.

  7. Medyo okay ang article mo ngayon dahil walang blind item, walang third party. Galing mismo sayo ang opinyon mo at wala kang ginamit or inimbentong ibang karakter. Wala ka din sinisiraan this time. Nevertheless, my opinion of you still remains.

Leave a Reply

Your email address will not be published.