LAST SUNDAY, KAHIT malamig sa isa sa dalawang pinakabagong studio ng GMA-7 kung saan umeere nang live ang Showbiz Central, nakita namin kung paano pagpawisan nang husto si John Lapus sa segment niyang Don’t Lie To Me kung saan ang nakasalang sa lie detector test ay si Lovi Poe. Puro kasi lie ang resulta ng mga sagot ng young actress. At sa mga gano’ng pagkakataon, kailangan ngang sumayaw nitong si Sweet with matching lifting na talagang inihahagis pa siya sa ere ng mga back-up dancers niya nang bonggang-bongga.
Hingal na hingal na sa pagod si John na nagbiro pang hindi raw kaya may galit sa kanya si Lovi kaya sinasadyang mag-lie para pasayawin siya nang pasayawin. Anyway, kahit ayaw ni Lovi na matanong hinggil sa pagpunta sa Hong Kong during the arraignment of her rumored boyfriend na si Ronald Singson hinggil sa kasong illegal possession of drugs, hindi pupuwedeng hindi siya magbigay ng pahayag kaugnay rito.
Ayon sa dalaga, she was there as a friend daw. Magkaibigan daw sila ni Ronald, at gano’n daw siya bilang kaibigan. Na kahit sino sa friend niya na nangangailangan ng suporta, she will just be around.
So ipinipilit pa rin ni Lovi na magkaibigan lang sila ng anak ni Governor Chavit Singson kahit pa marami ang hindi naniniwala na talagang friends lang sila.
Eh… wala naman tayong magagawa kung walang kapaguran sa pagdi-deny si Lovi. Karapatan niya kung ayaw man niyang umamin. Eh, ‘di mag-deny siya hanggang gusto niya.
NAGKAROON KAMI NG pagkakataong makapanayam si Governor Singson recently para sa isang segment for Showbiz Central. Mahaba ang itinakbo ng panayam namin na ‘yon. At ayon sa kanya, kahit paano raw ay naibsan ang kanyang pag-aalala nang pumayag na ang Hong Kong court na makapag-bail ang anak niyang si Ronald.
Consistent pa rin si Governor Singson sa pagsasabing naniniwala raw siya sa bersiyon ng kuwento ng kanyang anak na na-frame up lang ito. Gano’n pa man, ipinauubaya raw nila sa court ang tungkol sa nasabing kaso. At umaasa silang malalagpasan din ng kanilang pamilya at matinding pagsubok umanong ito.
Sakay ng kanyang private plane si Governor Chavit nang magtungo sa Hong Kong kamakailan kasama nga si Lovi. At natutuwa raw siya sa pagsama na iyon ng young actress para magbigay ng suporta kay Ronald.
“Noon pa man, ah… wala naman ‘yong sinasabing nag-away sila,” aniya. “Natural lang naman sa magkasintahan iyon, eh. ‘Yong hindi pagkakaintindihan. Wala namang diperensiya masyado iyon.
“Hinanap nga ni Lovi si Ronald kaagad. At napilitan kaming magsabi sa kanya nang nangyari. Kasi noong unang nabalitaan namin, eh… alangan namang sasabihin namin sa buong bansa? So, itinago muna namin at inaasahan naming mabibigyan ng lunas.
“Nu’ng nalaman ni Lovi, nalungkot nga siya. Sabi niya gusto niyang dalawin. ‘Ika ko huwag munang dalawin dahil hindi pa alam ng publiko. Mag-aano ng atensiyon kapag pumunta ka roon, sabi ko sa kanya. Pero nu’ng nandu’n na, eh talagang sumama na siya para makita si Ronald.”
On board in his private plane, pareho umano silang worried ni Lovi for Ronald. Gano’n daw ang kanilang pakiramdam hangga’t hindi natatapos ang isinagawang hearing kung saan nga pumayag ang korte na mag-bail ito ng 1 million hongkong dollars o mahigit limang milyong piso.
After ng hearing, matagal pa raw silang naghintay ni Lovi sa paglabas ni Ronald dahil sa mga kaukulang dokumento pang kailangang ayusin. At nakita raw niya kung gaano katiyaga umano ang aktres sa pagdamay hindi lang kay Ronald kung hindi sa buong pamilya niya sa problemang kinakaharap nila ngayon.
“Very close naman sa aming pamilya si Lovi. Nagpupunta pa nga siya sa aming lalawigan (Ilocos Sur). Napakabait niya. Natutuwa naman kami sa kanya. At parang member na nga siya ng family namin.”
Nakita rin kaya niya ang pagmamahal ni Lovi sa anak niyang si Ronald?
“Oo. Gano’n.”
So hindi talaga totoo na break na sina Lovi at Ronald?
“Ah… hindi. Hindi totoo ‘yon.
“Nagkaroon sila ng tampuhan pero agad-agad namang naayos nila.”
Hindi raw sumabay sa kanya pauwi si Lovi. Nagpaiwan ito to spend more time daw with Ronald at kinabukasan pa umuwi.
“Bakit siya (Lovi) nagpaiwan? Eh siyempre, matagal silang (Lovi and Ronald) hindi nagkita. Kailangan nila sigurong mag-usap pa rin at magkasama.”
Boto raw siya sa young actress para kay Ronald.
“Oo. Botong-boto ako kay Lovi. At mahusay naman ang napapansin kong relationship nila.
“Si Ronald din naman, mukhang in love din talaga sa kanya. Hindi ko pa siya nakitang parang gano’n ka-in love nga kumpara sa dati,” na mga nakarelasyon ng anak ang nais niyang tukuyin.
Mensahe ng pasasalamat ang hangad daw niyang maiparating kay Lovi matapos itong magpakita ng sobrang suporta kay Ronald sa biyahe nilang iyon sa Hong Kong.
“Talagang kailangan ni Ronald ang suporta. Lalo na ngayon sa situwasyon niya. I hope hindi magbabago si Lovi sa ganu’ng ugali niya na nagustuhan namin sa kanya. So… botong-boto kami kay Lovi. Pasadong-pasado siya sa amin,” panghuling nasabi ni Governor Singson.
So… very much on pa rin nga sina Lovi at Ronald! Alam n’yo na?
Rubbing Elbows
by Ruben Marasigan
