BUNTIS SI ROXANNE Guinoo, ito ang balitang naglalabasan ngayon na kung saan ay magpapakasal (o naikasal na) raw ang aktres sa non-showbiz boyfriend. Ayon sa tsika, hindi raw ngayon nag-i-entertain ng interbyu ang aktres dahil sa pag-iwas tungkol sa kanyang kalagayan. Pero kung paniniwalaan ang balita, two months preggy raw ang dalaga.
Isa sa mga kaibigan ni Roxanne ang nagkumpirma sa kanyang kalagayan at nagsabing nagdadalang-tao ang dalaga na kung saan ay hindi naman daw tinatalikuran ng non-showbiz boyfriend ang dinadala ng aktres.
“Actually matagal na siyang gustong pakasalan ng kanyang boyfriend. Kaya lang, si Roxanne lang talaga ang umaaayaw,” sabi pa ng aming kausap.
Habang isinusulat namin ang balitang ito, patuloy naming tinatawagan si Roxanne sa kanyang pribadong number ng phone, subalit hindi niya sinasagot ang aming tawag at text.
Lantaran na talaga ngayon ang relasyon ni Jericho Rosales at ng SNN lady reporter na si Cesca Litton. Nagsimula ang nasabing relasyon last year at ngayon lang pinangatawanan ng dalawa ang kanilang pagmamahalan.
Nakausap namin si Cesca at tinanong namin sa kanya ang isyu sa kanila ni Jericho, kung saan malulutong na halakhak lang ang kanyang sagot. “Wala na kami ng boyfriend kong doctor, matagal na!” Pahayag ni Chesca nang itanong namin sa kanya kung paano na ang non-showbiz boyfriend niya ngayong matunog ang balitang may relasyon sila ni Echo.
“Ha-ha-ha!” ‘Yun lang ang sagot ni Cesca sa bawat tanong namin, like kung kelan sila officially naging mag-on? Ano ang kanyang nagustuhan sa aktor, at kumusta na ang kanilang relasyon?
Hindi man aminin ni Cesca kung ano ang tunay na relasyon nila ni Jericho, obvious na nakikipagmabutihan na siya sa dating boyfriend nina Kristine Hermosa at Heart Evangelista.
KUMPIRMADONG DARATING NA ng bansa si Nora Aunor matapos na magparetoke nang todo-todo sa Japan, kung saan ayon sa huling balita, higit na mas bata ngayong tignan ang Superstar bago pa siya umalis ng bansa ilang taon na ngayon ang nakalilipas.
Sa pagbabalik ni Nora sa bansa, ang isa sa tiyak na matutuwa ay ang kumare niyang si Vilma Santos dahil magkaribal man sila sa popularidad ay magkaibigan naman sila in real life.
Say ng aming spy, dahil sa ginawang pagpaparetoke ni Nora ay hindi malayong magmukhang mag-ina raw ngayon si Ate Vi at ang Superstar na tiyak na ikatataas ng kilay ng marami nating kaibigang Vilmanians.
More Luck
by Morly Alinio
