Karapatan sa Asawang May Iba Nang Kinakasama

Dear Atty. Acosta,

MAGANDANG UMAGA po. Itatanong ko lang po kung may karapatan ba ako sa aking asawa na mayroon nang ibang kinakasama. Kami po ay kasal sa huwes at may tatlong anak na babae. Noon po ang pagkakaalam ko ay nakulong siya sa Saudi kaya hindi nakakapagpadala sa amin subalit hindi naman po pala totoo na nakulong siya. Taun-taon po ay umuuwi siya sa Zamboanga. Iyon pala, ang alam ng kanyang pamilya na may ibang asawa na ito at mayroon na rin pong isang anak. Hindi po ako nagsasalita dahil ang mga kapatid niya ay nagbibigay sa amin ng kaun-ting pera. Subalit noong umuwi siya rito last 2008 ay sinabi niya sa akin na hiwalay na raw po kami. Nagulat po ako. Pinaalis ako ng biyenan ko sa bahay namin dahil sa kanila po iyon at nagsalita siya na kukunin ang dalawang anak ko na ang edad ay 14 at 12. Ang bunso ko raw ay isama ko na lang sa bahay ng mga nanay ko. Hindi po sumama ang mga anak ko. Sa ngayon po ay nagpapadala naman ang asawa ko kaya lang ay kulang ito. Nasa Saudi po siya at maganda ang trabaho niya. Ang sustento po namin buwan-buwan ay P10,000 sa tatlong bata. Kinukuha ko po iyon sa kapatid niyang bunso. Ano po ba ang dapat kong gawin para sa amin na lang niya ito ipadala at ano po rin ang karapatan ko bilang asawa niya, kasi ayaw niyang dagdagan ang pera na pinapadala niya dahil hindi naman daw ako kasali? May karapatan po ba ako sa kinikita niya?

Maraming salamat po.

Lubos na gumagalang,

Lissa

 

Dear Lissa,

AYON SA batas, ang mag-asawa ay mayroong obligasyong suportahan ang isa’t isa at ang kanilang mga anak. (Art. 195, Family Code of the Philippines) Malinaw na may obligasyon kayong suportahan ng inyong asawa sampu ng inyong mga anak lalo na kung siya lamang sa inyong dalawa ang mayroong trabaho.

Ayon din sa batas, ang halaga ng pi-nansyal na suporta na maaaring hilingin sa dapat magbigay ng suporta ay naaayon sa kakayanang magbigay ng may obligasyong magbigay ng suporta at sa pangangailangan

ng humihiling. (Article 201, Family Code of the Philippines) Kung hindi na makuha sa maayos na pag-uusap ang inyong paghingi ng karagdagang suporta o kahit magkasundo pa kayo sa halaga ng suporta, ito naman ay hindi tinutupad ng inyong asawa, maaari kayong magsampa ng kaukulang petisyon sa hukuman upang humingi ng karagdagang pinansyal na suporta mula sa inyong asawa.

Matapos magsampa ng kaukulang aksyon sa hukuman at pagkatapos ng mga pagdinig dito, ang hukuman na, sa ganitong sitwasyon, ang mag-uutos sa inyong asawa kung magkano ang halaga ng suportang pinansyal na dapat nitong ibigay sa inyo at sa inyong mga anak. Ang desisyon ng hukuman ay naaayon pa rin sa ebidensiyang inyong ihaharap dito at sa nabanggit na batas. Maaari rin ninyong hilingin sa hukuman na ipag-utos na sa inyo ipadala o ibigay ang suportang pinansiyal at hindi ito padaanin pa sa kapatid ng inyong asawa.

At dahil na rin sa nakadepende ang halaga ng suporta sa kakayahan ng dapat magbigay at sa pangangailangan ng humihiling, maaaring magbago o baguhin ng hukuman ang desisyon nito ayon na rin sa pagbabago sa mga nabanggit.  Samakatuwid, kapag nagbago ang katayuang pinansyal ng nagbibigay ng suporta, maaaring tumaas o bumaba ang halaga ng suporta na ibibigay sa dapat suportahan. Gayun din naman kung nagbago ang mga panga-ngailangan ng mga humihiling. (Article 202, Family Code of the Philippines)

Nais naming ipaalala sa inyo na ang opinyon na ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong ibang maidagdag.

Nawa’y kami ay nakatulong na maliwanagan kayo sa inyong suliranin.

 

Halinang manood ng “PUBLIC ATORNI: ASUNTO O AREGLO” tuwing LUNES, 9:20 pm sa AksyonTV.

Atorni First
By Atty. Persida Acosta

loading...

3 thoughts on “Karapatan sa Asawang May Iba Nang Kinakasama

  1. Iniwan po ako at ang dalawa naming anak ng aking asawa,nasa manila na po siya bumalik sa trabaho at may kinakasama na po siyang iba.pang apat na besis na po niyang ginawa sa akin ang makipagrelation sa ibang lalaki at tomboy.gusto po ng dati kung asawa kunin ang bunso naming anak.pwedi po bang mangyari yon na mapunta sa kanya ang aming bunsong anak?

  2. hellow po, tatanong ko po sana na tama ba ang pinaglalaban ko nagkaproblema po kaming magasawa. dahil sa hindi namin pagiging tapat sa isat isa…nauna po syang maluko skin at napakasakit para sakin kc ginawa nya yun ay sa sarili ko pang ina. sumakatuwid nawalan na po aq ng amor sa kanya nagayon po gusto ko nang makipaghiwalay sa kanya pero ayaw nya po..gumagawa po talaga sya ng dahilan para di aq makipaghiwalay sa kanya gang sa ginagamit nya na pong panakot ay papalayasin aq dito sa bahay namin at wala nadaw po aqng karapatan dito o sa kahit anu pang pagaari namin.kasama ko po ang bianan ko dito sa bahay..pero yung pagaari pong cnsabi ko ay lahat pa hulugan may karapatan pa po ba akong manatili dito at iapaglaban na tumira at gamitin ko ang sasakyan. pwede ko po bang ipaglaban na bayaran nya yun kahit maghihiwalay na kami.malaki po sweldo nya sa abroad. at kaya pa nyang bayaran yun subra pa para sa sarili nya ang matitira sa kanya. pwede ko po bang ipaglaban na sustentuhan lahat ng bayarin dito at paalisin bianan ko dto..para kami lang ng mga anak ko dito sa bahay…inaakusahan din po nya aq na may lalaki wala namn po syang mapakitang ibidensya kc ginagawa nya yun para dina aq maghabol sa sustento sa kanya,,, sana poy mabigyan nyo aq ng idea para dito tnx po…

  3. elow poh atty.my gusto lang poh aq linawin..my aswa poh aq my isang anak kmi poh ay ngsasama ngaun..kinasal poh kmi ng nov 4,2010 at narehstro sa nso ng may 23 2011 dti poh kasal xa poh nong 1994 pero nadsisynan na ng korte na null and void na ung kasal nya sa una..nadisisynan ang kasal na void na 2007.kya lng ung unang aswa nya nanggulo parin at ndi naniniwla na void na ang ksal nila cmula xa nanggulo jan. 2011..pawla wla un..den 2012 ngchat nanaman xa skin na kailngn q daw mlaman ang katotohnan knasal daw cla ng 2009..pnacheck nya skin ang cnomar at  220 nga my record na ksal nila pero sa registration nila june 29 2012 na narehistro ng nlaman nya na kinasal kmi pinarehistro nya sa municpyo ung 2009 na kasal nila..kya lng ung 2009 nilang kasal wlang marriage licnse..tanong q lang poh ung kasal na wlang lcynxa simulat sapol ay void d poh ba?tpos nong panahong kinasal kmi wla pong nkarhstrong kasal nong panahong iyon maliban nlang sa null and void nilang kasal nong 1994..pinagmumukha kz ng babae skin ngaun na xa daw ang legal wife at pwede daw nya akong kasuhn ng bigamy..pgkakaalm q lalaki ang pwede nyang kasuhn non..

Leave a Reply

Your email address will not be published.