Kanino Ibibigay ang Piyansa?

Dear Atty. Acosta,

ISA PO akong seaman at naglalayag papuntang Australia. Ask ko lang po regarding sa bail o piyansa. Nakakulong po kasi ang pamangkin kong babae sa kasong pagdadala ng Marijuana. Sabi sa amin ng PAO ay maaari raw mag-bail ang pamangkin ko. Kanino po ba namin ibibigay ito, sa judge, sa fiscal na may hawak ng kaso o sa PAO lawyer?

Peter

 

Dear Peter,

UNA SA lahat, ang bail o piyansa ay inilalagak para sa pansamantalang kalayaan ng taong nasa ilalim ng kustodiya ng batas at para masigurong siya ay dadalo sa paglilitis ng kasong kriminal na isinampa laban sa kanya. Ito ay maaaring ilagak sa pamamagitan ng pagdedeposito sa korte ng halagang itinakda nito o ng taga-usig sa demanda. Maaari rin itong maisakatuparan sa pamamagitan ng Surety Bond, Property Bond o Recognizance (Sec. 1 Rule 114, Revised Rules of Court of the Philippines).

Hinggil naman sa iyong katanungan, ang piyansa ay maaaring ilagak sa korte kung saan nakabinbin ang kasong kriminal. Kung wala ang judge o hukom ng nasabing korte, ito ay maaaring ilagak sa sino mang hukom o judge ng Regional Trial Court, Metropolitan Trial Court, Municipal Trial Court o Municipal Circuit Trial Court ng probinsya, lungsod o munisipalidad. Kung ang akusado ay naaresto sa lugar maliban kung saan nakabinbin ang kaso, ang piyansa ay maaaring ilagak sa hukom o judge ng Regional Trial Court na nakakasakop sa nasabing lugar at kung walang hukom o judge na makukuha, maaari itong ilagak sa hukom ng Metropolitan Trial Court, Municipal Trial Court o Municipal Circuit Trial Court ng nasabing lugar (Sec. 17 (a), Rule 114, Revised Rules of Court of the Philippines).

Kung ang inirekomendang piyansa ay lubhang malaki kumpara sa kakayahang pampinansyal ng iyong pamangkin, maaari niyang hilingin sa korte na ito ay babaan. Kapag ito ay pinahintulutan ng korte, maaari na siyang maglagak ng piyansa nang mas mababa sa itinakda. Sa sandaling ang piyansa ay mailagak na, maglalabas ng kautusan ang korte para sa pansamantalang pagpapalaya sa iyong pamangkin.

Isa sa mga kondisyon ng piyansa o bail ay dapat dumalo ang iyong pamangkin sa mga pagdinig sa korte patungkol sa kanyang kasong kriminal, kung ang kanyang presensiya ay kailangan ng korte. Kung siya ay hindi nakadalo at ito ay walang sapat at makatarungang kadahilanan, maaaring ipag-uutos ng korte na ipagpatuloy ang pagdinig sa kaso sa kabila ng kanyang hindi pagsipot dito. Ito ang tinatawag na trial in absentia. (Par (c), Sec. 2, Rule 114, Revised Rules of Court of the Philippines).

Nawa ay naliwanagan ka sa opinyon naming ito.

Atorni First
By Atty. Persida Acosta

loading...

2 thoughts on “Kanino Ibibigay ang Piyansa?

  1. Dear atty acosta,

    Atty acosta tanung ko lang po, paano po ba mag lakad ng pyansa kung idadaan mo po surety bond?.kame po ba mismo ang kailangan maglakad nito or may ibang tao ang kailangan maglakad ng pyansa?.nakulong po kc ang kapatid ko sa salang snatching pero nagawa lang po yun dahil sa udyok ng mga kaibigan na pagtripan ang isang babaeng studyante na agawin po ang low tech or basic phone..nahuli at nakulong po sya, pero napyansahan ko po sya ng 15k para pansamantalang makalaya, ngayon po hinde po sya nka attend ng unang hearing sa dhilan na syay napunta sa probinsya, nung nkauwe nmn po sya ng manila habang nagpapaandar ng motorsiklo eh nacheck poin po sya at kinulong sa dahilan na wala syang dalang lisensya..nakita po na may warrant sya dhil nga po hnde daw umattend ng unang hearing..kaya nakulong po sya at dinala sa manila city jail october 2015, ngayon po mag jujune 2016 na hnde prinpo tpos ang hearing, sa katunayan po ngayong may 23 2016 ay may hearing sya knina kaso po wala ung judge kaya sa august daw po ulet ang hearing..hirap na hirap na po ung kapatid ko panu po ba gagawin or panu po ba mag lakad ng bail? .kc may pinaasikaso po kme sa surety bond 35k daw po pyansa, mahirap lng po kme at matatanda na magulang walang sariling bahay..san po kme kukuha ng ganung kalaking pera..wala po bang paraan para mababaan un?.sana po ay mabasa nyo ang liham ko po..salamat po at mabuhay po kayo

  2. Dear Atty.Acosta,
    Magandang gabi po,itatanong ko lang po sa inyo kung my piyansa po ba ang counterfeit?Black african po ang bf ko at nahulihan sya ng pekeng pera kasama ng isa pa nyang kaibigan.humihingi po ang taga CIDG ng halagang 500thousand pesos,sa pagkakaalam po kasi namin ay depende po ang piyansa or maximum 200thousand po?! naaawa po ako sa bf ko sa kadahilanang sinaktan po nila at nalagasan mo ng dalawang ngipin ng hinuli po nila.Atty dinadawit din po nila ang pangalan ko kahit inosente po ako at wala naman sa pinangyarihan.mula po nung 25 ng April hanggang sa kasalukuyan po ay nakadetained pa rin po sila sa Bicutan.at isa pa pong pinagtataka ko at kung bakit sa Makati City po sila nakuha pero sa Bicutan po sila dinala? sana po ay matulungan nyo ako kung ano po ang pinakamaganda konng gawin. natatakot po akong dalawin ang bf ko dahil po sinasangkot nila ako sa kaso.maraming salamat po at asahan ko po ang inyong sagot…

Leave a Reply

Your email address will not be published.