KAPAG NAG-I-STARTALK KAMI, mas bongga ang mga tsismis na pinag-usapan namin off the air kesa sa on air, huh!
Napag-uusapan namin doon si James Yap na parang PR na yata nito si Ricky Lo na lagi niyang kausap.
Bago kami nag-ere, kausap nito si James sa telepono para klaruhin ang isyung nali-link ito sa host ng Diz Iz It na si Grace Lee.
Nagulat daw si James sa tanong sa kanya ni Ricky dahil hindi nga raw niya kilala si Grace Lee.
Kahit naman si Grace ay sinagot din ang isyung ‘yun na never pa raw silang na-introduce sa isa’t isa although nagkakasabay lang daw sila sa parlor minsan. Kaya nagtataka ito bakit may ganu’ng isyung lumabas.
Paliwanag pa ni James, wala raw siyang ginagawa ngayon kundi bahay diretso practice, laro, tapos balik ng bahay.
Behaved daw siya ngayon at maingat daw siyang ma-involve sa mga ganu’ng intriga.
Meron pa ngang lumalabas na isyung nagri-rent-a-car na lang daw siya ngayon dahil wala na siyang kotse.
Siyempre, react naman diyan ang manager ni James na si Dondon Monteverde dahil okay naman daw ang kinikita ngayon ng sikat na basketbolista kaya hindi na niya kailangang mag-rent ng kotse. Meron naman siyang kotseng gingamit. Ito ba ‘yung bigay sa kanya noon ni Kris Aquino?
Anyway, tahimik lang talaga ngayon si James lalo na’t wala pa rito si Kris at inaayos na ng abogado ni Kris ang pagiging null ng kanilang kasal. Abangan na lang natin!
TALAGANG SINAGOT NI Francine Prieto ang mga paninira sa kanya dahil sa katabaan nito nang rumampa siya sa FHM kamakailan lang.
Ang dami kasing nagri-react nu’ng rumampa siyang naka-one piece at talagang nagmumura ang mga pata niya sa hita at puwet.
Sinagot ito lahat ni Francine sa Twitter account niya na hirap na hirap na nga raw siya sa pagpapayat. Wala naman daw siyang magagawa dahil ganu’n talaga ang katawan niya gawa nang pagka-half-Norwegian niya.
Pero sey ni Francine, kahit ano pang panlalait sa kanya, mahal pa rin daw niya ang katawan niya.
Sabi nga niya sa Twitter account niya: “Baka ‘eto na yung purpose ko sa life na matagal ko nang sinasabi. Gusto kong maging inspiration sa ibang tao. Kung paano ko malalampasan ang weight issues ko. Basta no matter what, I love my body. I love my curves.”
Bongga ang Francine, ‘di ba? Talagang sa gitna ng mga panlalait sa kanya, humaharap pa rin at ipinagtatanggol ang sarili.
Naawa pa nga ang reporter ng Startalk sa kanya dahil pagkatapos pa raw nitong rumampa sa FHM, tumuloy pa ito sa radio program niya na madaling-araw na natatapos.
Talagang kayod pa rin siya dahil siya lang naman ang inaasahan ng mga kapatid niya. Nabanggit pa nga raw nito minsan sa Twitter account niya na parang ATM na raw siya ng mga kapatid niya. ‘Yun na!
CONGRATULATIONS PALA KINA LJ Reyes at Paulo Avelino dahil ganap na silang magulang. Nanganak na si LJ nu’ng Sabado ng madaling-araw sa New York at normal delivery ito.
Kaagad na nag-post din si Paulo na isa na nga raw siyang certified father. Kaya nakarating ito sa Startalk at na-interview ang young actor nu’ng nakaraang Sabado.
Sayang at hindi pa nakakuha ng US visa si Paulo kaya hindi nito nasamahan si LJ sa panganganak sa Amerika. Wish pa rin niyang maayos ang visa niya para madalaw naman daw niya ang kanyang mag-ina.
Mga Mata ni Lolita
by Lolit Solis
