KUMALAT SA INTERNET ang paglipat ni Rachelle Ann Go sa GMA-7 at noong Lunes nga naganap ang kumpirmasyon na makakasama na sa “Party Pilipinas” ang champion singer na naka-ilang taon din sa ASAP sa ABS-CBN.
Nakapagpaalam na rin nga si Rachelle sa kanyang co-champion na si Sarah Geronimo na kapamilya niya sa Viva at sa ASAP. I’m sure nakarating na rin ang balitang ito sa mga kapwa champion singers ni Rachelle lalo na sa ex-boyfriend nitong si Christian Bautista.
Noong una ay ayaw pa ngang aminin ni Rachelle ang kanyang napipintong paglipat. Sa Twitter page nito, sinabi niyang “Sa lahat po ng nagtatanung… Hindi ko pa po alam sa Viva kung anung kaganapan…Mangyayari ang dapat mangyari…lets not worry.. :’)”. Pero ngayong kumpirmado na ang lahat, nabawasan na naman ng champion singer ang ASAP XV.
Pero bali-balitang madadagdagan din naman ng isa pang magaling na singer ang roster ng ASAP dahil lilipat naman daw sa kabilang bakod si Gerald Santos. Naku, huh, parang exchange gift lang.
Pagkatapos ni Rachelle Ann, kumalat din sa Twitter ang paglipat diumano ni Iya Villania sa kabilang istasyon. Agad-agad naming tinext ang TV host-actress at kinumpirma nito na hindi totoo ang kumakalat na balita. Masaya at maraming proyekto si Iya sa ABS-CBN at sa mga subsidiaries nito kaya wala pang dahilan para lumipat.
Sa kasalukuyan, si Iya ay isa mga mainstay hosts ng ASAP XV, Us Girls at VJ ng Myx. Sa dami ng mga artista ngayon, ang magkaroon ka ng tatlong regular shows ay hindi na masama. Wala pa rito ang mga out of town rakets at endorsements niya. Kaya wala pa talagang dahilan para lumipat ng istasyon!
MARAMI ANG NAGTATAKA kung bakit naging ganu’n ang interview kay Claudine Barretto sa Showbiz Central noong Linggo. Parang may mali sa mukha ni Claudine dahil nahihirapan itong humarap sa camera at laging nakatagilid. Pati ang ayos ng kanyang buhok ay parang tinatakpan ang mukha niya. Usap-usapan ng ilan na baka nagpa-botox ang aktres kaya parang namamaga pa ang mukha nito. Wala pa kaming kumpirmasyong nakukuha kung bakit nga naging ganu’n ang kanyang interview!
Pero ang sigurado namin, head to head ang magkapatid na sina Claudine Barretto at Gretchen Baretto ngayong Sabado. Ngayong Sabado na magsisimula ang drama anthology ni Claudine sa GMA-7 samantalang ang pangalawang pagsabak ni Gretchen Baretto sa MMK naman ang mapapanood sa ABS-CBN. Ito ang nagbigay ng acting award kay Gretchen sa nakaraang PMPC Star Awards for TV at sa trailer pa lang ng napanood namin, e mukhang very promising na nga ang episode na ito.
Mapanood nga!
NEW TIMESLOT NA ang Us Girls ngayong Huwebes. Huwebes pa rin mapapanood ang inyong favorite lifestyle magazine show kasama sina Iya Villania, Chesca Garcia at Angel Aquino. Pero 9 P.M. na ang airing nito. Inusog para mapagbigayan ang ilang hiling ng mga viewers na medyo late na nakauuwi mula sa kanilang mga trabaho at eskuwelahan.
Ngayong Huwebes, exciting ang episode ng Us Girls dahil sa temang “Believe it or Not”, makakasama natin sina Lea Salonga at Agua Bendita star Matteo Guidicelli na sasamahan si Iya na mag-slide-diving at kayaking sa Club Manila East. Magpapakita rin kami ng ilang kakaibang restaurants at shops na hindi niyo aakalaing meron! At ‘eto pa, isang damit na puwede niyong suotin nang halos sampung iba’t ibang paraan!
Lahat ng ‘yan sa Us Girls, Huwebes 9 P.M. Nood ka, ha?!
