Hatian sa mana ng magkakapatid

Dear Atty. Acosta,

 

BAGO PO namatay ang mga biyenan ko ay sinabing sa asawa ko mapupunta ang kanilang bahay at lupa. Ito po ay alam ng kanilang iba pang mga anak. Apat po silang magkakapatid at bunso po ang aking asawa. Ngayon pong naghahatian na ang magkakapatid sa mana, ayaw nang kilalanin ng mga kapatid ng asawa ko ang bahay at lupang ipinamana sa kanya. Katuwiran kasi nila ay konti lang naman ang mamanahin nilang magkakapatid at baka mawalan pa sila kapag ibinigay ang bahay at lupa sa asawa ko. Ano po ba ang sinasabi ng batas tungkol dito?

 

Tessa

 

Dear Tessa,

 

SAPAGKAT HINDI mo nabanggit sa iyong liham na mayroong huling habilin o “last will and testament” ang mga biyenan mo, ipapalagay nating wala ngang ganitong dokumento silang naiwan o isinagawa. Kung magkaganun, ang pagtitiyak ng iyong mga biyenan na mapupunta sa iyong asawa ang kanilang bahay at lupa sa sandaling sila ay pumanaw na ay walang-bisa. Ito ay sapagkat ayon sa batas, ang mga kahalintulad na pamamahagi ng ari-arian ay dapat nakapaloob sa isang mabisa at balidong “last will and testament” o ang tinatawag na huling habilin. Sa pamamagitan nito, ang hatian o ang pamamahagi sa mga ari-arian ng isang taong pumanaw na ay maisasakatuparan sang-ayon sa kanyang kagustuhan na naaayon sa batas. (Article 783, New Civil Code of the Philippines)

Gayun din, kung ang naturang ari-arian ng iyong mga biyenan ay hindi naman ipinagkaloob sa iyong asawa sa pamamagitan ng isang balidong donasyon na magkakabisa sa oras na sila ay pumanaw na, talagang walang bisa ang nasabing pagkakaloob sa iyong asawa ng bahay at lupa ng iyong mga biyenan.

Kung magkaganun, walang-bisa ang paraan ng pamimigay ng iyong mga biyenan ng kanilang bahay at lupa sa iyong asawa. Dahil dito, ang naturang ari-arian ay isasama sa lahat ng mga ari-arian ng iyong mga biyenan upang ito ay hatiin at ibahagi sa lahat ng tagapagmana nila. Dahil apat ang kanilang mga anak, hahatiin sa apat ang nasabing mga ari-arian nang pantay-pantay. Ang pamamaraang ito ay sang-ayon sa New Civil Code of the Philippines, partikular na ang Artikulo 980 nito.

Kung talagang interesado kayo sa nasabing bahay at lupa, maaari ninyong hilingin sa mga kapatid ng iyong asawa na ibigay lamang sa inyo ito kapalit ng halaga ng salapi na kapantay ng kaparte o mana nila. Kung sakaling sila ay pumayag, ito ay kailangan ilagay sa isang notaryadong dokumento na nagbabahagi ng mana at naglilipat ng karapatan sa minanang mga ari-arian ng kapatid ng iyong asawa papunta sa kanya. Ang dokumentong ito ay tinatawag na “Extrajudicial Settlement of Estate with Absolute Sale”.

Atorni First
By Atty. Persida Acosta

loading...

One thought on “Hatian sa mana ng magkakapatid

  1. pwede po magtanong? pano po ba hatiaan. yung bahay po in laws ko bebenta po. yung mother in law ko po namatay last dec 30, 2015 and yung father in law ko na lng po yung buhay. 2 po magkapatid husband ko. yung father in law ko po kasama namin ng husband ko alagaiin na din po since 2015 pa. yung hipag ko po ever since po may sakit magulang nya ang hirap po hingan khit pambili ng gamot pero may kaya po cila sa buhay seaman po asawa nya. ngyon po nalaman po nya na nag down ng 1m yung bibili ng bhay at gsto na po nya kunin father in law ko. nung wala po pera d po nya pinapansin ngayon may pera po kinukuha nya pero ayaw po ibigay husband ko. mas matanda po yung hipag ko sa husband ko. sabi po hipag ko kukunin na daw po nya yung share nya sabi ko po yung lhat ng abuloy ng mother in law ko nsa 200k din po yon sinolo ng hipag ko wla din binigay khit isang kusing sa husband ko and father in law ko. katwiran po hipag binbawi daw po nya yung nagastos nya yung nahospital byenan ko sabi ko po husband ko kwentahin din namin yung nagstos namin sa mother in law ko po simula nung na bed rest po cya last nov. 2015. pano po ba yung dapat gawin? ano po yung tamaang hatiaan kc buhay pa po father in law ko pero may lapses na po memory nya. umiiyak po kc hinahanap po nya pera nya sa hipag ko.

Leave a Reply

Your email address will not be published.