Gerald Anderson, may itinatagong girlfriend daw Sarah Geronimo, inaalat ang lovelife!

HINIHINTAY NA talaga ang pagbabalik sa Pilipinas at pagsasalita ni Dra. Vicki Belo tungkol sa hiwalayan nilang dalawa ni Hayden Kho. Alam ng kanyang mga anak na sobra siyang nasaktan sa naganap na hiwalayan, dahil paulit-ulit namang ipinaglaban ng kanilang mommy ang kanyang pagmamahal kay Hayden, kesehodang nagkakatampuhan sila sa pamilya.

Maraming nagsisimpatiya sa sikat na doktora, dahil ang tagal na niyang nagsakripisyo tungkol sa kanyang pagmamahal kay Hayden. Pero hinihintay na rin ang kanyang paliwanag tungkol sa isyung na-buking siya ni Hayden na mayroong ibang lalaki.

Napagbibintangan si Hayden na baka gumagawa lang ng isyu para mailigtas ang kanyang sarili, dahil kaiinisan na naman siya ng mga taga-showbiz kung talagang siya ang nagtaksil kay Dra. Vicki lalo pa’t nakaplano na nga silang magpakasal.

Pero marami rin naman sa mga tunay na kaibigan ng sikat na doktora ang kumokontra na si Hayden ang mapakasalan ni Belo. Marahil daw, kung talagang may ibang lalaki nang napupusuan ang Mommy ni Cristalle Henares, ay sumuko na talaga siya sa pagmamahal kay Hayden.

Nilalait din si Hayden na ang kapal daw ng mukha, dahil nagawa pang pagtaksilan si Dra. Vicki, samantalang lahat na ay ginawa para sa kanya. Huwag namang ganu’n agad ang paghuhusga. Hindi pa naman kasi malinaw ang lahat tungkol sa gusot nila ngayon ni Dra. Belo.

Ang huling usap-usapan ay naghahanap na raw si Hayden ng bagong condo na malilipatan. Kasi nga, para kay Hayden ay ang gulo-gulo ngayon ng sitwasyon ng kanyang lovelife. Gusto muna niyang maging matahimik.

MEDYO INAALAT talaga ang lovelife ni Sarah Geronimo, kaya pagkatapos ng hiwalayan nilang dalawa ni Rayver Cruz ay halatadong sobra-sobra pa rin siyang nag-iingat sa susunod na pagkakataon na magkakaroon siya ng bagong manliligaw. Kung sobra siyang nasaktan sa hiwalayan nila ni Rayver at sa pagkakalapit nila dati ni John Lloyd Cruz, ay mukhang tagilid din ang kapupuntahan ng pakikipaglapit

niya kay Gerald Anderson.

Kung tungkol sa loveteam, patok na rin ‘yung kina Sarah at Gerald, kaya nga nakadalawa na silang pelikula na pinagtambalan. Hindi sila naggagamitan, kundi nagkakatulungan, kaya maganda ang friendship nila sa ngayon. Pero kung patungo na sa relasyon at ligawan ang usapan ay maingat silang pareho sa pagbibigay ng mga detalye sa kanilang mga pahayag. Kasi nga, parang mayroong pinagtatakpan, na baka kailangan muna nilang pangalagaan ang kanilang loveteam.

‘Yung pagiging single at conservative ni Sarah ay kapani-paniwala. Pero ang kaguwapuhan ni Gerald ay mahirap pagtiwalaan na iyung-iyo siya. Sobra siyang lapitin ng mga babae sa likod at harap ng kamera, at alam na alam iyan ni Kim Chiu, na iniyakan niya noon. Magaling umiwas si Gerald sa pangungulit ng press. Pero maipapaliwanag ba niya ang pagkakaroon diumano ng itinatagong girlfriend na artista rin, at nasa bakuran ng ABS-CBN? Nadinig na rin marahil ni Sarah ang tungkol sa nasabing tsismis, kaya ipinauubaya niya kay Gerald kung papaano sasagutin ang mga tanong na hindi siya ang dapat sumagot.

ChorBA!
by Melchor Bautista

Previous articlePara pumabor sa impeachment ni CJ Corona Sen. Lito Lapid, ginapang ni Kris Aquino?!
Next articleDahil sa away ng kanilang mga ina Richard Gutierrez, pinersonal si Ynna Asistio?!

No posts to display